హైకోర్టులోని న్యాయవాదుల ఆమరణ నిరాహార దీక్ష భగ్నం

హైదరాబాద్: రాష్ట్ర హైకోర్టు ప్రాంగణంలో గత నాలుగురోజులుగా ఆమరణ నిరాహార దీక్ష చేస్తున్న న్యాయవాదులను గురువారం అర్ధరాత్రి దాటిన తర్వాత ఆస్పత్రికి తరలించారు. అర్ధరాత్రి ఒంటిగంట దాటిన తర్వాత ఒక 108 అంబులెన్సు, 300 మందికి పైగా పోలీసులు మోహరించారు. హైకోర్టు వెనుక గేటు ప్రాంతంలో భారీసంఖ్యలో మహిళా పోలీసులను సిద్ధంగా ఉంచారు. మూడు బృందాల టాస్క్‌ ఫోర్స్ పోలీసులు హైకోర్టు ఆవరణలో మూడో అంతస్తులోకి వెళ్లి, న్యాయవాదులు ఆమరణ నిరాహార దీక్ష చేస్తున్న స్థలానికి చేరుకున్నారు. మరికొందరు ముందుగేటు వద్ద సిద్ధంగా ఉన్నారు. అర్ధరాత్రి 2.15 గంటల సమయంలో లోపలకు దూసుకెళ్లిన పోలీసులు, దీక్షలో ఉన్న న్యాయవాదులు సత్యం రెడ్ది, జ్యోతికిరణ్, విజయకుమార్ గౌడ్‌లను అరెస్టు చేయడానికి ప్రయత్నించగా, వారు వాగ్వాదానికి దిగరు.

మొత్తానికి పోలీసులు వారిని 108 అంబులెన్సులోకి బలవంతంగా ఎక్కించారు. అక్కడి నుంచి వారిని ఉస్మానియా ఆస్పత్రికి తరలించారు. ఈ సందర్భంగా న్యాయవాదులు తీవ్రంగా ప్రతిఘటించారు. అయినా పోలీసులు బలవంతంగా వారిని తరలించేందుకు ప్రయత్నించడంతో పోలీసులు-న్యాయవాదుల మధ్య తీవ్రంగా పెనుగులాట జరిగింది. అంతకుముందు గురువారం సాయంత్రం దీక్షలో ఉన్న న్యాయవాదులను ఉస్మానియా ఆస్పత్రి వైద్యుల బృందం పరీక్షించింది. నాలుగు రోజులుగా ఆహారం తీసుకోకపోవడంతో వారి శరీరంలో చక్కెర స్థాయి తగ్గుతోందని, దీక్షలు కొనసాగిస్తే ఆరోగ్యం క్షీణించే ప్రమాదం ఉన్నందున వెంటనే చికిత్స అందించాలని చెప్పారు.