తెలంగాణ లాయర్లతో కొలిక్కి రాని మంత్రి వర్గ ఉప సంఘం చర్చలు

హైదరాబాద్: నామినేట్ న్యాయవాద పదవుల వివాదం కొలిక్కి రాలేదు. కాంగ్రెసు పార్లమెంటు సభ్యుడు మధుయాస్కీ మధ్యవర్తిత్వంలో న్యాయవాదులకు, మంత్రివర్గ ఉపసంఘానికి జరుగుతున్న చర్చలు కొలిక్కి రాలేదు. మంత్రివర్గ ఉపసంఘానికి నేతృత్వం వహిస్తున్న గీతారెడ్డి - ఈ చర్చల సారాంశాన్ని తోటి మంత్రులను, ముఖ్యమంత్రిని కలిసి వివరించారు. శనివారం కూడా చర్చలు కొనసాగే అవకాశం ఉంది. మరోపక్క కోర్టు కార్యకలాపాలను అడ్డుకుంటే న్యాయవాదులనైనా ఉపేక్షించేది లేదని హైకోర్టు హెచ్చరించింది. అయితే, హైకోర్టు ప్రాంగణంలోకి ప్రవేశంపై విధించిన నియంత్రణలను కాస్త సడలించాలని దాఖలైన పిటిషన్‌ను మన్నించింది.

రెండు వేల మంది బలగాలతో భారీ భద్రత నడుమ హైకోర్టు కొనసాగినా కార్యకలాపాలు మందగించాయి. న్యాయస్థానం నిర్ణయం పట్ల నిరసన వ్యక్తం చేసేందుకు శుక్రవారం మధ్యాహ్నం తెలంగాణ న్యాయవాదులు, ఉస్మానియా విద్యార్థులు రెండు విడతలుగా హైకోర్టులోకి ప్రవేశించేందుకు ప్రయత్నించారు. ఈ సందర్భంగా పోలీసులతో తోపులాట జరిగింది. న్యాయవాదుల రాళ్ల దాడిలో పోలీసులు, మీడియా ప్రతినిధులు గాయపడ్డారు. న్యాయవాదులకు మద్దతుగా శనివారం తెలంగాణలో విద్యా సంస్థల బంద్‌ పాటించాలని ఉస్మానియా విద్యార్థి ఐకాస పిలుపునిచ్చింది.