రవీంద్రనాథ్ రెడ్డి అరెస్టుకు పోరాటం: రైతు సంఘాల హెచ్చరిక

హైదరాబాద్: ఎరువులకు సంబంధించిన విషయంలో అక్రమాలకు పాల్పడిన కడప మేయరు రవీంద్రనాథ్ రెడ్డిని అరెస్టు చేసి ఆయనపై చర్యలు తీసుకునే వరకు పోరాటం కొనసాగిస్తామని ఆంధ్ర ప్రదేశ్ రైతుసంఘాలు హెచ్చరించాయి. ఈ నెలలోనే మరో నాలుగు రోజుల్లో నల్గొండ జిల్లాలోని దామరచెర్లలో ఉన్న హరిత ఫెర్టిలైజర్స ఎదుట ధర్నా నిర్వహిస్తామన్నారు. ప్రభుత్వం నుండి భారీ ఎత్తున రైతుల పేరుతో సబ్సిడీలు తీసుకొని వారిని నిండా ముంచుతున్నాడని ఆరోపించారు. రైతుల ఎరువులలో అక్రమాలకు పాల్పడుతున్న రవీంద్రనాథ్ రెడ్డిపై ప్రభుత్వం చర్యలు తీసుకోవాలన్నారు. ప్రభుత్వం స్పందించకపోతే రాష్ట్రవ్యాప్తంగా రైతు సంఘాలు అన్ని కలిసి రైతులను కూడగట్టి ఆయన్ను అరెస్టు చేసే వరకు ఉద్యమిస్తామన్నారు. త్వరలోనే కడపలో ధర్నాను చేపడుతామని తెలిపారు.

ప్రభుత్వం కడప మేయరుకు అండగా నిలుస్తుందన్నారు. అక్రమార్కుడికి అండగా ఉంటే ప్రభుత్వం ప్రతిష్ట దెబ్బతింటుందని, ఇప్పటికే వైయస్ ఉన్నప్పుడు కాంగ్రెస్ భారీ కుంభకోణాల్లో కూరుకు పోయిందని, రోశయ్య కూడా ఆయన దారిలో నడిస్తే ప్రభుత్వం కూలిపోతుందని హెచ్చరించారు. వ్యవసాయ శాఖ మంత్రి రఘువీరా రెడ్డి రవీంద్రనాథ్ రెడ్డికి న్యాయవాదిగా పని చేస్తున్నాడు. కాని ఒక మంత్రిగా వ్యవహరించడం లేదని దుయ్యబట్టారు. రఘువీరారెడ్డి ఇప్పటికైనా మారకపోతే రైతులు బుద్ది చెబుతారని హెచ్చరించారు.