బాలయ్యకు అనుకూలమే, కానీ ఆందోళనలో బసవతారకం సిబ్బంది

హైదరాబాద్: హైదరాబాద్ లోని ప్రతిష్టాత్మక వైద్యశాల దివంగత ఎన్టీఆర్ స్థాపించిన బసవతారకం హాస్పిటల్ ఉద్యోగులు హాస్పిటల్ ముందు సోమవారం ధర్నాకు దిగారు. తమకు ఇంక్రిమెంట్లు సహా పలు విషయాల్లో అన్యాయం జరుగుతోందని వారు సుమారు మధ్యాహ్నం రెండుగంటల నుంచి ఆందోళన చేస్తున్నారు. వారు సీఈవోకు, ఏవోకు వ్యతిరేకంగా, బాలకృష్ణకు అనుకూలంగా నినాదాలు చేస్తున్నారు.

సీఈవో ఆర్ పి సింగ్, ఏవో నీరజలే ఇందుకు కారణమని వారు ఆరోపిస్తున్నారు. మేనేజ్ మెంట్ కు ఈ విషయాలు తెలియవని వారు చిత్ర హీరో బాలకృష్ణను వెనకేసుకొచ్చారు. నీరజ, సింగ్ లు బాలకృష్ణ వచ్చినప్పుడు ఏదో సర్ది చెప్పి పంపిస్తున్నారని ఆయనకు హాస్పిటల్ లోని సమస్యలు ఏమీ తెలియకుండా చేస్తూ మమ్మల్లి సమస్యలలో ముంచుతున్నారన్నారు. ఓ సమయంలో ఆవేశపడిన ఉద్యోగులకు సీఈవోకు మధ్య తోపులాట జరిగింది. ఈ తోపులాటలో సింగ్ కింద పడ్డారు. ఏవో నీరజపై దాడికి పూనుకోగా పోలీసులు కల్పించుకొని ఆమెను ఆటోలో సురక్షితంగా బయటకు పంపించారు.

తమకు న్యాయం జరిగే వరకు ఆందోళన విరమించేది లేదని వారు అంటున్నారు. తమకు స్పష్టమైన హామీ ఇవ్వాలని వారు కోరారు. ఈ సందర్భంగా వారు బాలకృష్ణ జిందాబాద్, ఎన్టీఆర్ అమర్ హై ఆంటూ నినాదాలు చేశారు. అయితే ఇందులో ఆధిపత్య పోరు ఉన్నట్టు కొందరు భావిస్తున్నారు.