సిఎం రోశయ్యకు దొరికిన సోనియా గాంధీ అపాయింట్ మెంటు

న్యూఢిల్లీ: ముఖ్యమంత్రి కె. రోశయ్యకు ఎట్టకేలకు కాంగ్రెసు పార్టీ అధ్యక్షురాలు సోనియా గాంధీ అపాయింట్ మెంటు దొరికింది. ఆయన సోమవారం సాయంత్రం నాలుగున్నర గంటలకు సోనియాను కలుస్తారు. కాగా, సోనియాతో భేటీకి ముందుకు ఆయన కేంద్ర హోం మంత్రి పి. చిదంబరంతో భేటీ అయ్యారు. చిదంబరంతో ఆయన చర్చించిన విషయాలేమిటనేది తెలియడం లేదు. కాగా, ఆయన సోనియా రాజకీయ సలహాదారు అహ్మద్ పటేల్ తో కూడా భేటీ అయ్యారు. మంత్రివిస్తరణకు సంబంధించిన అంశంపై ఆయన అహ్మద్ పటేల్ తో చర్చించినట్లు సమాచారం.

మంత్రివర్గ విస్తరణపై ఆయన సోనియాతో మాట్లాడి, అందుకు గ్రీన్ సిగ్నల్ సంపాదించే యోచనలో ఉన్నట్లు చెబుతున్నారు. దాదాపు 9 నెలల తర్వాత ఆయన ఢిల్లీకి వచ్చారు. వైయస్ జగన్ వ్యవహార శైలిపై, ఆయన వర్గానికి చెందిన మంత్రులపై చర్యలు తీసుకునే విషయంపై, ప్రజారాజ్యం పార్టీని మంత్రివర్గంలో చేర్చుకోవడంపై రోశయ్య సోనియాతో మాట్లాడుతారని సమాచారం. మంత్రి పదవులు ఆశిస్తున్న శాసనసభ్యులు పలువురు ఇప్పటికే ఢిల్లీలో మకాం వేసి ప్రయత్నాలు సాగిస్తున్నారు.