అనంతపురంలో తెలుగు దేశం పార్టీ నేత దారుణ హత్య

అనంతపురం: అనంతపురంలో సోమవారం మధ్యాహ్నం తెలుగు దేశం పార్టీకి చెందిన ఓ నాయకుడు దారుణ హత్యకు గురయ్యాడు. అనంతపురంలోని శ్రీకంఠం సర్కిల్ వద్ద నున్న రూప గార్డెన్ లో ఉన్న తెలుగు దేశం పార్టీ నాయకుడు రఘునాథ్ రెడ్డిని ప్రత్యర్థులు వేటకొడవళ్లతో నరికి చంపారు. రఘునాథ్ రెడ్డితో పాటు ఉన్న ఆయన సమీప బంధువు చంద్రశేఖర్ రెడ్డికి ఈ దాడిలో తీవ్ర గాయాలయ్యాయి.

రఘునాథ్ రెడ్డి తాడిపత్రి తెలుగుదేశం పార్టీ నేత పేరం నాగిరెడ్డి అనుచరుడు. గతంలో జేసి దివాకర్ రెడ్డి అనుచరుడు నల్లపురెడ్డి హత్యకు ప్రతీకారంగానే రఘునాథ్ రెడ్డిని చంపినట్లు పోలీసు వర్గాలు అనుమానిస్తున్నాయి. పోలీసులు హత్య జరిగిన ప్రాంతానికి చేరుకొని వివరాలు సేకరిస్తున్నారు. రఘునాథ్ రెడ్డి పెద్దఒరుగోడు మండలం రెడ్డిపల్లి గ్రామానికి చెందినవాడు.