వైయస్ జగన్ ఓదార్పు యాత్రను అలా వదిలేయడమే

న్యూఢిల్లీ: తమ పార్టీ పార్లమెంటు సభ్యుడు వైయస్ జగన్ ఓదార్పు యాత్రను పట్టించుకోవద్దనే ధోరణితో కాంగ్రెసు అధ్యక్షురాలు సోనియా గాంధీ వ్యవహరిస్తున్నట్లు సమాచారం. ఆ విషయాన్ని ఆమె సోమవారంనాటి భేటీలో ముఖ్యమంత్రి కె. రోశయ్యకు చెప్పినట్లు తెలుస్తోంది. సోనియాతో జరిగిన భేటీలో రోశయ్య జగన్ ఓదార్పు యాత్ర విషయాన్ని ప్రస్తావించినట్లు తెలుస్తోంది. దాంతో జగన్ ను పట్టించుకోవద్దని ఆమె సూచించినట్లు చెబుతున్నారు. అయితే, జగన్ కు అనుకూలంగా ఉన్న మంత్రులు బాలినేని శ్రీనివాస రెడ్డి, పిల్లి సుభాష్ చంద్రబోస్ లకు మాత్రం మంత్రివర్గం నుంచి ఉద్వాసన పలకాలనే ఆలోచనలో ఉన్నట్లు చెబుతున్నారు. రాష్ట్ర వ్యవహారాలపై సోనియా గాంధీ పూర్తిగా గవర్నర్ నరసింహన్ మీద ఆధారపడినట్లు చెబుతున్నారు.

రాష్ట్ర ఆర్థిక వ్యవహారం విషయంలో రోశయ్య బాగానే పని చేస్తున్నప్పటికీ రాజకీయంగా ఆయన బలహీనంగా ఉన్నారని పార్టీ అధిష్టానం భావిస్తున్నట్లు తెలుస్తోంది. దీంతో రాష్ట్ర పరిస్థితులను చక్కదిద్దే బాధ్యతను స్వయంగా అధిష్టానం తన మీద వేసుకున్నట్లు సమాచారం. ఇందులో భాగంగా పార్టీ అధిష్టానం గవర్నర్ పై ఎక్కువగా ఆధారపడినట్లు చెబుతున్నారు. పార్టీ ఆంధ్రప్రదేశ్ వ్యవహారాల ఇంచార్జీగా వీరప్ప మొయిలీ కూడా నామమాత్రంగానే కొనసాగుతున్నారు. పిసిసి అధ్యక్షుడు డి. శ్రీనివాస్ కు, ముఖ్యమంత్రి రోశయ్యకు కూడా తెలియకుండా రాష్ట్ర వ్యవహారాలపై పార్టీ అధిష్టానం దృష్టి పెట్టినట్లు చెబుతున్నారు.