స్టూడియో ఎన్ ఉద్వాసనలపై చంద్రబాబు మీద సాక్షి రిపోర్టర్ల పోరు

హైదరాబాద్: స్టూడియో ఎన్ లో 70 మంది ఉద్యోగులను తొలగించిన సంఘటన తెలుగుదేశం పార్టీ అధ్యక్షుడు నారా చంద్రబాబునాయుడికి, కాంగ్రెసు కడప పార్లమెంటు సభ్యుడు వైయస్ జగన్ కు మధ్య పోరాటంగా మారేట్లుంది. స్టూడియో ఎన్ చంద్రబాబు సమీప బంధువు నార్నే శ్రీనివాస రావుకు చెందింది. ప్రస్తుతం దాన్ని చంద్రబాబు కుమారుడు లోకేష్ నిర్వహిస్తున్నట్లు సమాచారం. దీంతో ఉద్యోగుల ఉద్వాసనకు వ్యతిరేకంగా చంద్రబాబుపై సాక్షి దినపత్రిక, చానెల్ ఉద్యోగులు పోరాటం చేయాలని నిర్ణయించుకున్నారు. ఉద్యోగులను తిరిగి తీసుకునే వరకు ఆందోళన సాగిస్తామని సాక్షి రిపోర్టర్లు అంటున్నారు.

తమకు నోటీసులు ఇవ్వకుండా తొలగించారని స్టూడియో ఎన్ నుంచి ఉద్వాసనకు గురైన ఉద్యోగులు అంటున్నారు. చంద్రబాబును బుధవారం కొంత మంది కలిశారు. ఉద్యోగుల ఉద్వాసన అనేది వ్యాపారానికి చెందిన విషయమని, తనకు సంబంధం లేదని చంద్రబాబు వారితో చెప్పారు. దానిపై సాక్షి ఉద్యోగులు మండిపడుతున్నారు. ఉద్వాసనకు గురైనవారిలో ఎక్కువ మంది తెలంగాణకు చెందినవారు ఉండడంతో తెలంగాణ జర్నలిస్టులు కూడా రంగంలోకి దిగారు.