తెలంగాణకు సోనియా అనుకూలమన్న టిడిపి నేత జితేందర్ రెడ్డి

న్యూఢిల్లీ: తెలంగాణపై కాంగ్రెసు అధ్యక్షురాలు సోనియా గాంధీ తన వైఖరి చెప్పాలని తమ పార్టీ నాయకులంతా డిమాండ్ చేస్తుంటే తెలుగుదేశం నాయకుడు జితేందర్ రెడ్డి అందుకు విరుద్ధమైన ప్రకటన చేసి అందరినీ ఆశ్చర్యపరిచారు. తెలంగాణ రాష్ట్ర ఏర్పాటుకు సోనియా గాంధీ అనుకూలంగా ఉన్నారని ఆయన సోమవారం మీడియా ప్రతినిధులతో చెప్పారు. సోనియా అనుకూలంగా ఉన్నారు కాబట్టే తెలంగాణ రాష్ట్ర ఏర్పాటుకు ప్రక్రియను ప్రారంభిస్తున్నట్లు డిసెంబర్ 9వ తేదీన కేంద్ర హోం మంత్రి పి. చిదంబరం చేత ప్రకటన చేయించారని ఆయన అన్నారు. సీమాంధ్ర నాయకులు లాబీయింగ్ చేసి తెలంగాణ రాష్ట్ర ఏర్పాటును అడ్డుకున్నారని ఆయన విమర్శించారు. తమకు శ్రీకృష్ణ కమిటీపై అనుమానాలున్నాయని ఆయన అన్నారు.

శ్రీకృష్ణ కమిటీ తెలంగాణకు అనుకూలంగా నివేదిక ఇస్తుందనే నమ్మకం లేదని, శ్రీకృష్ణ కమిటీని సీమాంధ్ర నాయకులు ప్రభావితం చేసే అవకాశం ఉందని ఆయన అన్నారు. తాము తెలంగాణకు అనుకూలంగా ఉన్నాం కాబట్టే 2009లో తెలంగాణ రాష్ట్ర సమితి (తెరాస)తో పొత్తు పెట్టుకున్నామని, కెసిఆర్ ను గెలిపించుకున్నామని మహబూబ్ నగర్ జిల్లాకు చెందిన ఆ తెలుగుదేశం నాయకుడు అన్నారు. తెలంగాణకు తమ పార్టీ అనుకూలంగా ఉందని ప్రణబ్ ముఖర్జీ కమిటీకి లేఖ కూడా ఇచ్చామని ఆయన గుర్తు చేశారు.