ఢిల్లీ ధర్నా తర్వాతి కార్యాచరణ సీక్రెట్: నాగంలో టెన్షన్

న్యూఢిల్లీ: ప్రత్యేక తెలంగాణ కోసం వెంటనే పార్లమెంటులో బిల్లు ప్రవేశపెట్టాలంటూ ఢిల్లీలో తెలుగుదేశం పార్టీ ధర్నా సోమవారం 11 గంటల ప్రాంతంలో ప్రారంభమయి 5 గంటల వరకు పూర్తవుతుంది. ధర్నా సాఫీగా సాగిపోవాలని, ఎలాంటి అవాంతరాలు జరగకుండా ఉండాలని నాగం జనార్దన్ రెడ్డితో సహా ఢిల్లీ వెళ్లిన అందరు తెలుగుదేశం నాయకులు కోరుకుంటున్నారు. ఒకవేళ ఏవైన అనుకోని పరిణామాలు జరిగితే తట్టుకునేందుకు వారు సిద్ధంగా ఉన్నారా అనేది వారి వయసును, వారి ఆరోగ్య పరిస్థితిన బట్టి అందరినీ తొలుస్తున్న ప్రశ్న. తెలంగాణ కోసమని ఇంతదూరం వచ్చి ఏం సాధించకుండా వెళితే తెలంగాణలో తమకు ఆదరణ కరవవుతుందని వారు అభిప్రాయపడుతున్నారు.

సాయంత్రం ధర్నా పూర్తయ్యే వరకు వారు ఏఐసిసి అధ్యక్షురాలు సోనియా గాంధీ, ప్రధానమంత్రి మన్మోహన్ సింగ్ అప్పాయింట్ మెంట్ కోసం ప్రయత్నాలు చేస్తారు. అయితే వారు అప్పాయింట్ మెంట్ ఇవ్వకుంటే 5గంటలకు ధర్నా పూర్తయ్యాక ఏం చేస్తారనే విషయాన్ని వారు సీక్రెట్ గా ఉంచుతున్నారు. నాలుగు ముఖ్య డిమాండ్లతో తాము ఢిల్లీ ధర్నా చేపట్టినట్లు చెబుతున్నారు. ఈ శీతాకాలపు పార్లమెంటు సమావేశాల్లో తెలంగాణ బిల్లును ప్రవేశపెట్టడం, తెలంగాణ విద్యార్థులపై పెట్టిన కేసులు వెంటనే ఎత్తివేయటం వంటి తదితర డిమాండ్లు ఉన్నట్టు చెప్పారు. అయితే వారినుండి స్పందన రాకుంటే సాయంత్రం 5 గంటల తర్వాత ఏం చేస్తామనేది సీక్రెట్ అని వారు చెబుతున్నారు.