రామలింగేశ్వరుడి దగ్గర చిరుతల కలకలం: ఆందోళనలో భక్తులు

అనంతపురం: అనంతపురం జిల్లాలో రెండు చిరుతలు కలకలం సృష్టిస్తున్నాయి. వజ్రకరూరు మండలం రామాపురం గ్రామం దగ్గరలో జేరుట్ల వద్ద దక్షిణ కాశీగా పేరొందిన శ్రీ రామలింగేశ్వరస్వామి దేవాలయం ఉంది. ఆ దేవాలయం వద్దకు గత ఐదు రోజులుగా రెండు చిరుతలు వస్తున్నాయి. రోజు సాయంత్రం ఐదు గంటల సమయంలో వచ్చి అక్కడే నిద్రిస్తున్నాయి. అ తర్వాత ఉదయం ఆరుగంటలకు లేచి పదిగంటల వరకు అక్కడే ఉంటున్నాయి.

దేవాలయం దగ్గర ఉన్న ట్యాంకు దగ్గర అవి ఉంటున్నాయి. దీంతో భక్తులు, దేవాలయంలోని పూజారి భయాందోళనకు గురువుతున్నారు. అయితే ఐదు రోజులుగా వస్తూ అవి ఏ హానీ చేయడం లేదు. దేవాలయ ఆవరణలోనే ఉన్న పూజారి కుటుంబం ఎప్పుడూ తలుపులను బిగించుకొని బిక్కుబిక్కుమంటూ గడుపుతోంది. గ్రామం సైతం దేవాలయానికి కొద్ది దూరంలో ఉన్నప్పటికీ గ్రామస్తులూ ఆందోళన చెందుతున్నారు. ఓ యాభై మంది కలిసి పులుల దగ్గరకు వెళితే అవి భయపడి పారిపోతున్నాయని దేవాలయ పూజారి రాజేంద్రప్రసాద్ అంటున్నారు. అటవీ అధికారులకు ఇప్పటికే సమాచారం అందించామని అయితే వారినుండి ఎలాంటి స్పందన లేదని ఆయన ఆవేదన చెందుతున్నారు.