టిడిపి తెలంగాణ ఫార్స్: రైల్లో తాగుడు, సమైక్యవాది ఇంట్లో విందు

న్యూఢిల్లీ: తెలంగాణపై తెలుగుదేశం తెలంగాణ ప్రాంత నాయకుల వ్యవహారాన్ని ఓ ఫార్స్ గా తేల్చి పారేయడానికి కాంగ్రెసు కడప పార్లమెంటు సభ్యుడు వైయస్ జగన్ కు చెందిన సాక్షి దినపత్రిక, టీవీ చానెల్ ప్రయత్నిస్తున్నాయి. తెలంగాణపై పార్లమెంటు శీతాకాల సమావేశాల్లో బిల్లు పెట్టాలని డిమాండ్ చేస్తూ తెలుగుదేశం తెలంగాణ ప్రాంత నాయకులు సోమవారం ఢిల్లీలో ధర్నా చేసిన విషయం తెలిసిందే. ఢిల్లీకి తెలంగాణ నాయకులు ప్రత్యేకంగా ఓ రైల్లో వెళ్లారు. ఆ రైల్లో తెలుగుదేశం నాయకులు మద్యం సేవించారంటూ సాక్షి టీవీ చానెల్ ఓ వార్తాకథనాన్ని ప్రసారం చేసింది. తాగి పడేసిన మద్యం సీసాలను కూడా చూపించింది. తెలంగాణపై తెలుగుదేశం పార్టీ నాయకులకు ఉన్న చిత్తశుద్ధికి ఇది అద్దం పడుతోందంటూ వ్యాఖ్యానించింది. అయితే, సాక్షి టీవీ చానెల్ వాళ్లకు చెందినవారు తమలో చేరిపోయారని, వారే తాగి పడేసి తమపై ఆరోపణలు చేస్తున్నారని తెలుగుదేశం పార్టీ నాయకుడు దేవేందర్ గౌడ్ అన్నారు.

కాగా, తాజాగా మరో విషయాన్ని కూడా సాక్షి దినపత్రిక బయటపెట్టింది. తెలంగాణ కోసం సోమవారం జంతర్ మంతర్ వద్ద ధర్నా చేసి, చివరకు కాంగ్రెసు అధ్యక్షురాలు సోనియా గాంధీ నివాసం వైపు దూసుకెళ్లడానికి ప్రయత్నించి అరెస్టయ్యారు. ఆ తర్వాత రాత్రి సమైక్యవాది ఇంట్లో విందుకు తెలుదుదేశం తెలంగాణ ప్రాంతం తమ్ముళ్లు హాజరయ్యారని సాక్షి వ్యాఖ్యానిస్తోంది. మచిలీపట్నం పార్లమెంటు సభ్యుడు కొనుకుల నారాయణ రావు నివాసంలో పలువురు తెలంగాణ ప్రాంత నాయకులు విందులో మునిగితేలారని తేల్చింది. తెలంగాణ పట్ల తెలుగుదేశం తెలంగాణ ప్రాంత నాయకులకు ఉన్న చిత్తశుద్ధి ఇది అని వ్యాఖ్యానించింది.