రాష్ట్ర అవతరణ దినోత్సవంపై కాస్తా మెతకబడిన కోదండరామ్

హైదరాబాద్: నవంబర్ 1వ తేదీన ప్రభుత్వం నిర్వహించే రాష్ట్ర అవతరణ దినోత్సవాన్ని అడ్డుకోబోమని, కాని ఆ రోజున తెలంగాణలోని పది జిల్లాల్లో నిరసన ప్రదర్శనలు నిర్వహిస్తామని తెలంగాణ రాజకీయ ఐక్య కార్యచారణ కమిటి చైర్మన్ ప్రోఫెసర్ కోదండరాం అన్నారు. అయితే ఆ రోజున మంత్రులు అవతరణ దినోత్సవాల్లో పాల్గొనరాదని కోరుతున్నామని చెప్పారు.

ఒక వేళ పాల్గొన్నా నిరసన తెలపాలని ఆయన అన్నారు. రాష్ట్ర అత్యున్నత న్యాయస్థానం బెంచ్ కోసం సీమాంధ్రులు చేస్తున్న ఉద్యమానికి తెలంగాణ రాజకీయ ఐకాస మద్దతిస్తున్నట్లు చెప్పారు. ఇంత కాలం తెలంగాణ అవతరణ దినోత్సవాలను అడ్డుకుంటామని చెప్పిన ఆయన ఇప్పుడు నిరసనలకు మాత్రమే పరిమితమవుతామని చెప్పడం విశేషం. తాము రాష్ట్రావతరణకు వ్యతిరేకం గానీ సీమాంధ్ర ప్రజలకు వ్యతిరేకం కాదని ఆయన స్పష్టం చేశారు.