తెలంగాణ పేరుతో అమాయకులను బలి తీసుకుంటున్న కెసిఆర్

హైదరాబాద్: పర్యాటక శాఖామంత్రి జె గీతారెడ్డి ఇంట్లో లేని సమయంలో తెలంగాణ రాష్ట్ర సమితి నాయకుడు, సిద్దిపేట శాసనసభ్యుడు హరీష్ రావు తమ కార్యకర్తలతో కలిసి దాడి చేయటం హేయమైన చర్య అని చీప్ విప్ శైలజానాథ్ ఆరోపించారు. నవంబర్ 1వ తేది ఆంధ్ర ప్రదేశ రాష్ట్ర అవతరణ ఉత్సవాలను రద్దు చేయాలని ప్రభుత్వంతో కొట్లాడి, ఆ తర్వాత అడ్డుకోవాలని తమ కార్యకర్తలకు పిలుపునిచ్చిన తెరాస అధినేత కె చంద్రశేఖరరావు ఆ రోజు కంటికి కనిపించకుండా పోయాడని ఆరోపించారు. ఆయన ఎందుకు నిరసన ఉత్సవాలలో పాల్గొనలేదని ప్రశ్నించారు. పార్టీని నిలబెట్టుకోవడానికే ఆయన రాజకీయ దురుద్దేశ్యంతో తెలంగాణ పేరును వాడుకుంటున్నారన్నారు.

కెసిఆర్ చేస్తున్న ఉద్యమాల వల్ల ఆయనకుగాని, ఆయన కుటుంబ సభ్యులకు గాని ఎలాంటి నష్టం జరగటం లేదని, కానీ అన్యాయంగా తన ఉద్యమాల వల్ల అమాయకులను బలి చేస్తున్నారని మల్లు భట్టి విక్రమార్క అన్నారు. మంత్రి గీతారెడ్డి ఇంటిపై తెరాస వారి దాడి అమానుషమని అన్నారు.