బాబ్రీ కూల్చివేత సిగ్గుచేటు, తీర్పు మతవాదులకు చెంపపెట్టు: సోనియా

న్యూఢిల్లీ: అయోధ్యలోని బాబ్రీ మసీదు కూల్చివేత సిగ్గుచేటు అని ఎఐసిసి అధ్యక్షురాలు సోనియా గాంధీ అన్నారు. ఢిల్లీలోని లాల్ టోకరాలో మంగళవారం ఆమె ఎఐసిసి సదస్సులో ప్రారంభోపన్యాసం చేశారు. దేశం ఎదుర్కుంటున్న సమస్యలన్నింటినీ ఆమె ప్రసంగంలో ప్రస్తావించారు. బాబ్రీ మసీదు కూల్చివేతను తమ పార్టీ ఏ రోజు కూడా సమర్థంచలేదని, అయోధ్యపై అలహాబాదు హైకోర్టు ఇచ్చిన తీర్పు మతతత్వవాదులకు చెంపపెట్టు అని ఆమె అన్నారు. మతతత్వాన్ని దీటుగా ఎదుర్కోవాల్సిన అవసరం ఉందని సోనియా అన్నారు. లౌకికభారతానికి పోరాటం చేద్దామని ఆమె పార్టీ నాయకులకు పిలుపునిచ్చారు. మతతత్వంపై పోరాటం చేసి శాంతిసామరస్యాలను కాపాడుదామని ఆమె అన్నారు.

కాశ్మీర్ అల్లర్ల పట్ల ఆమె విచారం వ్యక్తం చేశారు. కాశ్మీర్ లో శాంతి స్థాపనకు అన్ని గ్రూపులతో చర్చలు జరపాల్సిన అవసరం ఉందని ఆమె అన్నారు. జమ్మూ కాశ్మీర్ స్థితి పట్ల ఆమె ఆందోళన వ్యక్తం చేశారు. జమ్మూ కాశ్మీర్ రాష్ట్ర అభివృద్ధి అత్యంత ప్రధానమైందని ఆమె అన్నారు. దేశ అంతర్గత భద్రతకు నక్సలైట్లు ముప్పుగా పరిణమించారని సోనియా అన్నారు. స్థానిక సంస్థల ఎన్నికల్లో 50 శాతం సీట్లు కేటాయిస్తామని ఆమె చెప్పారు. పార్లమెంటులో మహిళా రిజర్వేషన్ బిల్లును ప్రతిపాదించడానికి తమ పార్టీ కట్టుబడి ఉందని ఆమె చెప్పారు. అభివృద్ధిలో గిరిజనులకు వాటా కల్పించాల్సిన అవసరం ఉందని ఆమె అన్నారు.

దేశంలోని ప్రతి గ్రామంలో, ప్రతి బస్తీలో, ప్రతి కూడలిలో ఉన్న రాజకీయ పార్టీ కాంగ్రెసు ఒక్కటేనని చెప్పుకోగలమని ఆమె అన్నారు. పది రాష్ట్రాల్లో త్వరలో ఎన్నికలు జరగనున్నాయని, ఈ ఎన్నికలకు పార్టీ శ్రేణులు సమాయత్తం కావాలని, పార్టీ నాయకులు కలిసికట్టుగా పనిచేయాల్సిన అవసరం ఉందని ఆమె అన్నారు. ఈ సదస్సుకు వేయి మంది ప్రతినిధులు హాజరయ్యారు. ఆదర్శ్ హౌసింగ్ సొసైటీ కుంభకోణంలో ఇరుక్కున్న మహారాష్ట్ర ముఖ్యమంత్రి అశోక్ చవాన్, కామన్ వెల్త్ క్రీడల కుంభకోణంలో ఆరోపణలు ఎదుర్కుంటున్న సురేష్ కల్మాడీ కూడా ఈ సదస్సుకు హాజరయ్యారు.