ప్రెస్ కాన్ఫరెన్సు పెట్టి వెళ్లిపోయాడు: రఘువీరాపై చంద్రబాబు ధ్వజం

ఏలూరు: మంత్రి రఘువీరారెడ్డి బాధితులను ఆదుకుంటానని వచ్చి అలా చూసి ఇలా ప్రెస్ కాన్ఫరెన్సు పెట్టి చక్కా వెళ్లిపోయాడని తెలుగు దేశం పార్టీ అధ్యక్షుడు, మాజీ ముఖ్యమంత్రి చంద్రబాబానాయుడు తీవ్రస్థాయిలో ధ్వజమెత్తారు. తుఫాన్ ప్రభావ ప్రాంతాన్ని సందర్శించి, బాధితులను ఆయన పరామర్శించిన అనంతరం సోమవారం ఆయన విలేకరుల సమావేశంలో మాట్లాడారు. వరద బాధితులను ఆదుకోవడంలో కాంగ్రెస్ ప్రభుత్వం పూర్తిగా విఫలమయిందన్నారు. బాధితులను న్యాయం జరిగే వరకు తెలుగు దేశం పార్టీ వారికి అండగా ఉంటూ పోరాడుతుందని హామీ ఇచ్చారు. ప్రభుత్వానిది తుగ్లక్ ఆలోచన అని చంద్రబాబు విమర్శించారు.

ప్రభుత్వం బాధితులను వెంటనే ఆదుకోవాలని డిమాండ్ చేశారు. రైతులు తమ పంటను పూర్తిగా నష్టపోయారని అలా నష్టపోయిన వారికి ఎకరాకు రూ.లక్ష చొప్పున నష్టపరిహారం చెల్లించాలని డిమాండ్ చేశారు. అలాగే వర్షంలో కొంత ధాన్యం తడిసిందని అలా తడిసిన ధాన్యానికి ప్రభుత్వం మద్దతు ధర చెల్లించాలన్నారు. వచ్చే రబీ సీజన్ కి సబ్సిడీ విత్తనాలు అందించాలని కోరారు.