బరాక్ ఒబామా ప్రసంగానికి ముస్తాబైన భారత పార్లమెంటు

న్యూఢిల్లీ: అమెరికా అధ్యక్షుడు బరాక్‌ ఒబామాకు ఘన స్వాగతం పలికేందుకు భారత పార్లమెంటు ముస్తాబైంది. ఒబామా ప్రసంగించనున్న చారిత్రక సెంట్రల్‌ హాలును సర్వాంగ సుందరంగా తీర్చిదిద్దారు. సోమవారం పార్లమెంటు ఉభయసభల సభ్యుల నుద్దేశించి ఒబామా 18 నుంచి 20 నిమిషాల పాటు ఉపన్యసిస్తారని అధికార వర్గాలు తెలిపాయి. ఒబామా తన ప్రసంగం కోసం పాఠ్య పుస్తకం పరిమాణంలో ఉండే టెలిప్రామ్టర్‌ను ఉపయోగించనున్నారు. ఇలాంటి పరికరాన్ని సెంట్రల్‌ హాలులో వినియోగించటం ఇదే తొలిసారి. పార్లమెంటులో ఒబామా ప్రసంగ కార్యక్రమం సుమారు గంటపాటు ఉంటుంది. సాయంత్రం 5.25 గంటలకు విచ్చేసే అమెరికా ప్రథమ పౌరునికి ఉపరాష్ట్రపతి హమీద్‌ అన్సారీ, ప్రధాని మన్మోహన్‌ సింగ్‌, లోక్‌సభ స్పీకర్‌ మీరాకుమార్‌, పార్లమెంటు వ్యవహారాల మంత్రి పవన్‌ కుమార్‌ బన్సాల్‌ స్వాగతం పలుకుతారు. సాయంత్రం 5.38 గంటలకు ఒబామా ప్రసంగం ప్రారంభమవుతుంది. ఇదే వేదికపై ప్రధాని మన్మోహన్‌ సింగ్‌ కూడా ఆసీనులవుతారు. పార్లమెంటు సందర్శకుల పుస్తకం (గోల్డెన్‌ బుక్‌)లో ఒబామా సంతకం చేస్తారు.ఒబామా కోసం ఈసారి ప్రత్యేకంగా గోల్డెన్‌బుక్‌ను తయారుచేస్తున్నారు. ఇక మీదట ఆ పుస్తకంలో ఒబామా స్థాయి నాయకుల సంతకాలు మాత్రమే తీసుకుంటారు.

పార్లమెంటు సెంట్రల్‌ హాలుకు ఒబామా వచ్చిన సమయంలో ఎంపీలందరూ హుందాగా వ్యవహరించాలని పార్లమెంటరీ వ్యవహారాల మంత్రిత్వశాఖ ప్రత్యేకంగా కోరింది. ఈ మేరకు పార్లమెంటరీ పార్టీల నేతలకు ప్రత్యేక సందేశాన్ని పంపించారు. 2000 సంవత్సరంలో క్లింటన్‌ వచ్చిన సమయంలో పలువురు ఎంపీలు ఆయనతో కరచాలనం చేయటానికి బెంచీల మీద నుంచి దూకటం, ఒకరినొకరు నెట్టుకోవడం అప్పట్లో తీవ్ర విమర్శలకు కారణమైంది. ఈ దృశ్యాలున్న వీడియో క్లిప్పింగ్‌లను లోక్‌సభ స్పీకర్‌ మీరాకుమార్‌ తిలకించారు. హుందాగా వ్యవహరించాలని ఎంపీలకు సూచించటానికి ఆమె నిరాకరించారు. అయినప్పటికీ పార్లమెంటరీ వ్యవహారాల మంత్రిత్వశాఖ నుంచి ముందుజాగ్రత్తగా ప్రత్యేక సూచనలు జారీ అయ్యాయి.

పార్లమెంటు శీతాకాల సమావేశాలు మంగళవారం నుంచి ప్రారంభంకానున్నాయి. సుమారు నెల రోజుల పాటు జరిగే సమావేశాల్లో 23 బిల్లులు సభ ముందుకు రానున్నాయి. వీటిలో మహిళా రిజర్వేషన్‌, విద్యా ట్రైబ్యునళ్లు, పంచాయతీ రాజ్‌, పట్టణ స్థానిక సంస్థల్లో మహిళలకు 50 శాతం రిజర్వేషన్ల కేటాయింపు, భూ ఆక్రమణ బిల్లులు ప్రధానమైనవి.