టీవీ9పై బుసలు కొట్టిన తెలుగుదేశం నేత నాగం జనార్దన్ రెడ్డి

హైదరాబాద్: తెలుగుదేశం పార్టీని చీల్చడానికి కేంద్ర మంత్రి బంధువు ఒక్కరు ప్రయత్నిస్తున్నారంటూ వచ్చిన వార్తాకథనాలపై తెలుగుదేశం తెలంగాణ ప్రాంత నాయకుడు నాగం జనార్దన్ రెడ్డి తీవ్రంగా మండిపడ్డారు. ఆ వార్తాకథనాన్ని పెద్ద యెత్తున ప్రసారం చేసిన టీవీ9 తెలుగు టీవీ చానెల్ పై ఆయన తీవ్రంగా మండిపడ్డారు. ఆ చానెల్ తమకు క్షమాపణ చెప్పాల్సిందేనని, లేదంటే సభా హక్కుల ఉల్లంఘన తీర్మానం ప్రతిపాదిస్తామని ఆయన హెచ్చరించారు. తమ పార్టీ చీలిపోతుందంటూ వచ్చిన వార్తాకథనాల వెనక కాంగ్రెసు కుట్ర ఉందని ఆయన గురువారం సాయంత్రం మీడియా ప్రతినిధుల సమావేశంలో అన్నారు.

తెలంగాణకు చెందిన మంత్రులు సబితా ఇంద్రారెడ్డి, సునీతా లక్ష్మారెడ్డి, పొన్నాల లక్ష్మయ్య తెలంగాణకు ద్రోహం చేస్తున్నారని, ఆంధ్రా ప్రాంతం వాళ్లకు వంత పాడుతున్నారని ఆయన అన్నారు. ఈ మంత్రులు ఇరిగేషన్ శాఖ పదోన్నతుల్లో ఆంధ్రావాళ్లకు అనుకూలంగా వ్యవహరిస్తున్నారని ఆరోపించారు. ఫ్రీ జోన్‌పై సుప్రీం ఆదేశాలను పాటిస్తామంటూ హోంమంత్రి సబితారెడ్డి చెబుతున్నారని, హైదరాబాద్ ఫ్రీ జోన్ కాదన్న అసెంబ్లీ తీరానంపై మాట్లాడడం లేదని అన్నారు.