23న హైదరాబాద్ ముట్టడికి సిద్ధమవుతున్న ప్రభుత్వ ఉద్యోగులు

హైదరాబాద్: ఉద్యోగుల సమస్యల పరిష్కారంలో ప్రభుత్వం ఉదాసీనంగా వ్యవహరిస్తోందని ఉద్యోగ సంఘాల నాయకుల ఆగ్రహం వ్యక్తం చేస్తున్నారు. ప్రభుత్వ వైఖరికి నిరసనగా ఈ నెల 23న లక్షల మంది ఉద్యోగులతో హైదరాబాద్‌ను ముట్టడించాలని ఉద్యోగ, ఉపాధ్యాయ, కార్మిక, పింఛనర్ల ఐక్యకార్యాచరణ సమితి నిర్ణయించింది. డిమాండ్ల సాధన కోసం తొమ్మిది రోజులుగా ధర్నా చౌక్‌లో చేస్తున్న సామూహిక నిరాహార దీక్షలు మంగళవారం ముగిశాయి. ఇదే సమయంలో జిల్లాల్లోనూ వీటిని నిర్వహించి ప్రభుత్వ మొండి వైఖరిని ఉద్యోగ సంఘాల నేతలు నిరసించారు. ఇన్ని రోజులుగా తాము ఆందోళన చేస్తున్నా ప్రభుత్వం చర్చలకైనా ఆహ్వానించలేదని, కనీసం ఆందోళన విరమించుకోవాల్సిందిగా విజ్ఞప్తి కూడా చేయలేదని ఉద్యోగుల నేతలు ఆవేదన చెందుతున్నారు. సమస్యలపై ఏర్పాటైన మంత్రివర్గ ఉపసంఘం కూడా సమావేశాలను తూతూ మంత్రంగానే నిర్వహించిందని విమర్శిస్తున్నారు.

ఇంటి అద్దె భత్యం పెంపు, ఉపాధ్యాయుల అప్రెంటీస్‌ విధానం రద్దు, ప్రత్యేక విద్యా వాలంటీర్ల సర్వీసు క్రమబద్ధీకరణ వంటి అంశాలపై మంత్రుల బృందం ఏమాత్రం పట్టించుకోలేదని వారు ఆక్షేపిస్తున్నారు. ఉద్యమాన్ని తీవ్రతరం చేయటంలో భాగంగానే ఈ నెల 23న ఛలో హైదరాబాద్‌ కార్యక్రమానికి పిలుపునిస్తున్నట్లు ప్రకటించారు. ఆరోజు కనీసంగా 3 లక్షల మంది ఉద్యోగులు రాజధానికి తరలి వస్తారని వారి అంచనా. ఉద్యోగుల సమస్యల పట్ల రాష్ట్ర ప్రభుత్వం అనుసరిస్తున్న వైఖరిని ప్రధాని మన్మోహన్‌, యూపీఏ ఛైర్‌పర్సన్‌, కాంగ్రెస్‌ అధినేత సోనియా గాంధీ దృష్టికీ తీసుకెళ్లాలని ఉద్యోగ సంఘాల నేతలు భావిస్తున్నారు. అప్పటికీ రాష్ట్ర ప్రభుత్వ వైఖరిలో మార్పు రాకుంటే ఉద్యమాన్ని తీవ్రతరం చేసేందుకు ఏదో ఒక సమ్మె రూపాన్ని ఎంచుకోక తప్పదని వారు చెబుతున్నారు. వేతన సవరణ సమస్యలు మినహా ప్రధాన సమస్యలేవీ ప్రభుత్వం పరిష్కరించలేదన్న భావన ఉద్యోగుల్లో ఏర్పడింది.