చెవెళ్ల చెల్లెమ్మా! ఆంధ్రా చెల్లెమ్మా!: సబితపై ఎస్ ఐ అభ్యర్థుల ఆగ్రహం

హైదరాబాద్: ఎస్ఐ పోస్టుల రాత పరీక్షను వెంటనే రద్దు చేయాలని కోరుతూ నిరాహార దీక్ష చేస్తున్న ఎస్ఐ అభ్యర్థుల నిరాహార దీక్ష బుధవారానికి ఆరో రోజుకు చేరుకుంది. తాము గత ఆరు రోజులుగా నిరాహార దీక్ష చేస్తున్నప్పటికీ ప్రభుత్వం పట్టించుకోవటం లేదని ఆరోపించారు. మంత్రి సబితారెడ్డి చెవెళ్ల చెల్లెమ్మనా, తెలంగాణ చెల్లెమ్మనా, ఆంధ్రా చెల్లెమ్మనా నిర్ణయించుకోవాలని డిమాండ్ చేశారు. తెలంగాణ కోసం ఉద్యమించిన ఇంద్రారెడ్డి భార్య అయిన సబితారెడ్డి తెలంగాణకు వ్యతిరేకంగా పనిచేయటం దారుణమన్నారు. ప్రభుత్వం వెంటనే పరీక్ష రద్దుని నిర్ణయాన్ని ప్రకటించాలని కోరారు. లేదంటే తమ ఉద్యమం మరింత ఉధృతం చేస్తామన్నారు.

కాగా బుధవారం ఉదయం హోంమంత్రి సబితారెడ్డి ముఖ్యమంత్రి రోశయ్యతో భేటీ అయ్యారు. ఎస్ఐ రాత పరీక్షల విషయంపై చర్చించేందుకు వారు భేటి అయ్యారు. కాగా మంగళవారం ప్రభుత్వం అఖిలపక్షాన్ని ఏర్పాటు చేసింది. రాత పరీక్ష వల్ల వచ్చే న్యాయపరమైన చిక్కులు ఈ అఖిల పక్షంలో ప్రస్తావించలేదని అనంతరం విలేకరులతో ఆమె చెప్పారు. రాష్ట్రపతి ఉత్తర్వుల్లోని 14 ఎఫ్ క్లాజును తొలగించడానికి చిత్తశుద్ధితో ప్రయత్నిస్తున్నామని ఆమె అన్నారు.