స్సెక్ట్రమ్ పై ప్రధాని మన్మోహన్ సింగ్ కు సుప్రీంకోర్టు అక్షింతలు

న్యూఢిల్లీ: టెలికాం మంత్రి ఎ. రాజా రాజీనామా చేసినా ప్రధాని మన్మోహన్ సింగ్ ను స్పెక్ట్రమ్ కుంభకోణం వదలడం లేదు. ప్రధాని అలసత్వంపై సుప్రీంకోర్టు అక్షింతలు వేసింది. ఆయన నిష్క్రియాపరత్వంపై ప్రశ్నల వర్షం కురిపించింది. రాజీనామా చేసిన టెలికాం మంత్రి ఎ.రాజా ప్రాసిక్యూషన్‌కు అనుమతి మంజూరుచేయాలన్న విజ్ఞాపనపై నిర్ణయం తీసుకోవడంలో ప్రధాని ప్రదర్శించిన జాప్యాన్ని కోర్టు ఇరుకునబెట్టే ప్రశ్నలతో ఏకిపారేసింది. "అనుమతించాల్సిన అథారిటీ(ప్రధానమంత్రి)యే విజ్ఞాపనను సీటు కింద పెట్టుకుని కూర్చోవచ్చా?" అని కోర్టు ఘాటుగా ప్రశ్నించింది. జనతాపార్టీ అధ్యక్షుడు, కేంద్రమాజీ మంత్రి సుబ్రమణ్యంస్వామి దాఖలుచేసిన పిటిషన్‌పై మంగళవారం విచారణ సందర్భంగా జస్టిస్‌ జి.ఎస్‌.సింఘ్వి, జస్టిస్‌ ఎ.కె.గంగూలీల నేతృత్వంలోని బెంచ్‌ ఈ వ్యాఖ్యలు చేసింది. రాజా ప్రాసిక్యూషన్‌కు అనుమతి ఇవ్వాలని సుబ్రమణ్యంస్వామి చేసిన విజ్ఞప్తిపై నిర్ణయం తీసుకోకుండా ప్రధాని చాలా కాలంగా నానుస్తున్నారు. దీంతో ఆయన సుప్రీంకోర్టు తలుపుతట్టారు. ప్రభుత్వం తరఫున కోర్టుకు హాజరైన సొలిసిటర్‌ జనరల్‌ గోపాల్‌ సుబ్రమణ్యం బెంచ్‌ నుంచి కఠిన ప్రశ్నల్ని ఎదుర్కొనాల్సి వచ్చింది.

"నిష్పక్షపాత, సుపరిపాలన కలిగిన ప్రభుత్వం సుప్రీంకోర్టు నిర్దేశించిన మూణ్నెల్ల గడువులోగా అనుమతి మంజూరుచేయడం సాధ్యమే. ఇప్పటికే 16 నెలలు గడిచిపోయింది. అనుమతి ఇవ్వడం నాకు ఇష్టంలేదని సంబంధిత అథారిటీ చెప్పొచ్చు. సానుకూలంగానో, వ్యతిరేకంగానో స్పందించొచ్చు. కానీ నిష్క్రియ, మౌనం అనేవి ఇబ్బందికరంగా మారాయని మేం ఇక్కడ గమనించాం" అని కోర్టు చురకలంటించింది. సుబ్రమణ్యంస్వామి నుంచి ఫిర్యాదు అందిన మూడు నెలల్లోగా సంబంధిత అథారిటీ(ప్రధాని) చర్యలు ప్రారంభించి ఉండాల్సిందని కోర్టు అభిప్రాయపడింది. నిర్దిష్ట గడువులోగా నిర్ణయం తీసుకోవాలని హవాలా వ్యవహారానికి సంబంధించిన వినీత్‌ నారాయణ్‌ కేసు తీర్పులో పేర్కొన్న మార్గదర్శకాలు స్పష్టంచేస్తున్న విషయాన్ని న్యాయమూర్తులు గుర్తుచేశారు.