వైయస్ జగన్ కు దూరమై, చిరంజీవికి దగ్గరవుతున్న ఉండవల్లి

హైదరాబాద్: దివంగత నేత వైయస్ రాజశేఖర రెడ్డికి అత్యంత సన్నిహితుడైన కాంగ్రెసు రాజమండ్రి పార్లమెంటు సభ్యుడు తన విధేయతలను మార్చుకున్నట్లు కనిపిస్తున్నారు. వైయస్ ప్రోద్బలంతో ఆయన రామోజీరావుపై సుదీర్ఘ పోరాటం చేయడానికి అప్పట్లో సిద్దపడ్డారు. ఇప్పుడు దాన్ని వదిలేసుకున్నట్లే కనిపిస్తున్నారు. పైగా, వైయస్ జగన్ కు ఆయన దూరమైనట్లు కూడా కనిపిస్తున్నారు. ఆయన ఇటీవల చేసిన వ్యాఖ్యలు ఈ విషయాన్ని తెలియజేస్తున్నాయి. ఓదార్పు యాత్రకు వస్తున్న ప్రజలు వైయస్ జగన్ ను రాజకీయంలో బలపరచబోరనే పద్ధతిలో ఆయన మాట్లాడారు.

కుటుంబంలో ఎవరైనా చనిపోతే పరామర్శించడం మన సంప్రదాయమని, ఆ సానుభూతితోనే వైయస్ జగన్ ఓదార్పు యాత్రకు ప్రజలు వస్తున్నారని ఆయన అన్నారు. ప్రజారాజ్యం పార్టీ అధినేత చిరంజీవి సభలకు విశేషంగా జనాలు పస్తున్నారని, వారు నిజమైన ప్రజలని ఆయన అన్నారు. దీన్ని బట్టి ఆయన అంతరంగమేమిటో అర్థం చేసుకోవచ్చు. అంతేకాకుండా, పార్టీ అధిష్టానం మనోగతానికి అనుగుణంగానే ఆయన ఈ వ్యాఖ్యలు చేశారని అంటున్నారు.