2జి స్పెక్ట్రంపై వెంటనే జెపిసి వేయాలి: చంద్రబాబు నాయుడు

న్యూఢిల్లీ: 2జి స్పెక్ట్రం కుంభకోణంపై కేంద్ర ప్రభుత్వం వెంటనే జెపిసి(జాయింట్ పార్లమెంటు కమిటీ)ని వేయాలని తెలుగుదేశం పార్టీ అధ్యక్షుడు, మాజీ ముఖ్యమంత్రి నారా చంద్రబాబు నాయుడు మంగళవారం విలేకరుల సమావేశంలో డిమాండ్ చేశారు. రాజా లక్షాడెబ్బయి వేల ప్రజాధనాన్ని కొల్లగొట్టినప్పటికీ ఏఐసిసి అధ్యక్షురాలు సోనియాగాంధీ, ప్రధానమంత్రి మన్మోహన్ సింగ్ మౌనం దాల్చటం వెనుక ఉద్దేశ్యమేమిటన్నారు. యూపిఏ తన హయాంలోని అవినీతిని కప్పిపుచ్చుకోవడానికి ప్రయత్నాలు చేస్తుందన్నారు. వారి మౌనం అవినీతి మరింత పెరగడానికి దోహదం చేస్తుందన్నారు.

కేంద్ర విజిలెన్సు కమిషనర్ పి.జె.థామస్ నియామకంపై సుప్రీంకోర్టు తప్పు పట్టినందున ఆయనను వెంటనే తొలగించాలని ఆయన డిమాండ్ చేశారు. పామోలివ్ కుంభకోణం కేసులో ఆయన ఆరోపణలు ఎదుర్కొంటున్నారు. దానిని కేరళ విజిలెన్సు కమిషన్ దర్యాఫ్తు చేస్తుందని, అలాంటి సందర్భంలో ఆ దర్యాప్తు సంస్థకు ఆయననే అధిపతిగా చేస్తే పారదర్శకత ఏముంటుందన్న సుప్రీం కోర్టు వ్యాఖ్యలను ఆయన గుర్తు చేశారు. అవినీతి ఆరోపణలు ఎదుర్కొంటున్న ఆయన నియామకాన్ని గతంలోనే ప్రతిపక్షాలు తప్పు బట్టాయని ఆయన చెప్పారు.