సిఎల్పీ సమావేశానికి జగన్ డుమ్మా: బెంగళూర్ లోనే మకాం

హైదరాబాద్: కాంగ్రెసు లెజిస్లేచర్ పార్టీ (సిఎల్పీ) సమావేశానికి కడప పార్లమెంటు సభ్యుడు వైయస్ జగన్ హాజరు కాకపోవచ్చునని అంటున్నారు. తనకు అనుకూలంగా వ్యవహరిస్తున్న కాంగ్రెసు ఆంధ్రప్రదేశ్ వ్యవహారాల ఇంచార్జీ వీరప్ప మొయిలీ వస్తున్నా ఆయన మాత్రం సమావేశానికి దూరంగానే ఉండాలని నిర్ణయించుకున్నట్లు తెలుస్తోంది. వైయస్ జగన్ ప్రస్తుతం బెంగళూర్ లోని తన నివాసంలో ఉన్నారు. ఆయన భుజం నొప్పితో బాధపడుతున్నారని, అందువల్ల విశ్రాంతి తీసుకుంటున్నారని చెబుతున్నారు.

అయితే, తాజా పరిణామాలను ఆయన ఎప్పటికప్పుడు తెలుసుకుంటున్నట్లు, తన సన్నిహితులతో మాట్లాడుతున్నట్లు తెలుస్తోంది. తనపై పార్టీ అధిష్టానం ఏ విధమైన చర్యలు తీసుకున్నా దిగి రాకూడదనే ఉద్దేశంతోనే ఆయన ఉన్నట్లు తెలుస్తోంది. ఒక రకంగా పార్టీ అధిష్టానానికి పరోక్ష హెచ్చరికలు చేస్తున్నట్లు సమాచారం. జగన్ అనుచరుడు గోనె ప్రకాశ రావు మాటలు ఆ విషయాన్ని తెలియజేస్తున్నాయి. వైయస్ జగన్ వ్యక్తి కాదు, శక్తి అని ఆయన అంటూ వైయస్ జగన్ పై చర్యలు తీసుకుంటూ పరిస్థితి తీవ్రంగా ఉంటుందని, కాంగ్రెసుకు బీహార్ లో పరిస్థితి ఎదురవుతుందని ఆయన ఓ టీవీ చానెల్ ప్రతినిధితో అన్నారు.