చిరంజీవికి నిరాశ: ఉప ముఖ్యమంత్రిగా గీతారెడ్డికి చాన్స్

హైదరాబాద్: ఉప ముఖ్యమంత్రి పదవి విషయంలో ప్రజారాజ్యం పార్టీ అధ్యక్షుడు చిరంజీవికి నిరాశే మిగిలింది. వైయస్ జగన్ వర్గం ఇబ్బందులు కలిగిస్తే కాంగ్రెసు ప్రభుత్వానికి మద్దతిచ్చి ఉప ముఖ్యమంత్రి పదవి తీసుకోవాలని ఆయన ఆశపడ్డారు. కానీ, అటువంటి పరిస్థితేమీ ఉత్పన్నం కాకపోవడంతో చిరంజీవికి పదవి ఇచ్చే విషయన వెనక్కి పోయింది. ఉప ముఖ్యమంత్రి పదవి తెలంగాణకు చెందిన కాంగ్రెసు నాయకురాలు జె. గీతారెడ్డికి దక్కే అవకాశం ఉన్నట్లు తెలుస్తోంది. రాయలసీమ నుంచి కిరణ్‌కుమార్‌రెడ్డిని సీఎంగా నియమించినందున, తెలంగాణ నుంచి ఉప ముఖ్యమంత్రి ఉంటారని కాంగ్రెస్‌ పార్టీ రాష్ట్ర వ్యవహారాల ఇన్‌ఛార్జి వీరప్పమొయిలీ బుధవారమిక్కడ ప్రకటించారు.

గీతారెడ్డి పేరుతో పాటు పొన్నాల లక్ష్మయ్యల పేరును కూడా ఉప ముఖ్యమంత్రి పదవి కోసం పరిశీలించే అవకాశాలున్నాయని తెలిసింది. దామోదరం రాజనర్సింహ పేరు కూడా ముందుకు వస్తోంది. 1960లో రాయలసీమకు చెందిన దామోదరం సంజీవయ్య సీఎంగా ఉన్న సమయంలో రాష్ట్రంలో తొలిసారిగా తెలంగాణకు చెందిన కేవీ రంగారెడ్డిని ఉప ముఖ్యమంత్రిగా నియమించారు. 1980 వరకు ఈ సంప్రదాయం కొనసాగింది. సీఎంగా ఉన్న వ్యక్తి ఒక ప్రాంతానికి చెందిన వారైతే, ఉప ముఖ్యమంత్రిగా మరో ప్రాంతం వ్యక్తిని నియమించేవారు. 1992లో కోట్ల విజయభాస్కర్‌రెడ్డి సీఎంగా ఉన్నప్పుడు కోనేరు రంగారావును ఉప ముఖ్యమంత్రిని చేశారు.