దైవసాక్షిగా తెలుగులో కిరణ్ కుమార్ రెడ్డి ఒక్కరే ప్రమాణం

హైదరాబాద్: ఆంధ్రప్రదేశ్ రాష్ట్రానికి కొత్త ముఖ్యమంత్రిగా నల్లారి కిరణ్ కుమార్ రెడ్డి గురువారం మధ్యాహ్నం 12.15 నిమిషాలకు రాజ్ భవన్లో ప్రమాణ స్వీకారం చేశారు. ఆయనచే గవర్నర్ నరసింహన్ ప్రమాణ స్వీకారం చేయించారు. మంత్రివర్గ విస్తరణకు సమయం ఉన్నందున ఆయన ఒక్కడే ముఖ్యమంత్రిగా ప్రమాణ స్వీకారం చేశారు. కిరణ్ కుమార్ రెడ్డి తెలుగులో దైవసాక్షిగా ప్రమాణ స్వీకారం చేశారు. ఈ కార్యక్రమంలో కిరణ్ కుమార్ రెడ్డి తల్లి సరోజమ్మ, ఆయన కుటుంబసభ్యులు, బంధువులు పాల్గొన్నారు.

ఆపద్ధర్మ ముఖ్యమంత్రి కొణిజేటి రోశయ్య, రాష్ట్ర వ్యవహారాల ఇంఛార్జ్ వీరప్ప మొయిలీ మాజీ మంత్రులు సబితారెడ్డి, దానం నాగేందర్, కెవిపి రామచందర్ రావు, టి సుబ్బిరామిరెడ్డి తదితరులు హాజరయ్యారు. కిరణ్ కు పలువురు అభినందనలు తెలిపారు. కెవిపి రామచందర్ రావు హాజరు కావడం వైయస్ జగన్ వర్గానికి ఓ సంకేతాన్ని పంపడంగా భావిస్తున్నారు. గులాం నబీ ఆజాద్ కూడా కిరణ్ కుమార్ రెడ్డి ప్రమాణ స్వీకారోత్సవానికి హాజరయ్యారు.