కర్ణాటక గవర్నర్ గా రోశయ్య: రెండు రోజుల్లో నిర్ణయం?

హైదరాబాద్: ముఖ్యమంత్రి పదవికి రాజీనామా చేసిన కొణిజేటి రోశయ్య కర్నాటక గవర్నర్‌గా వెళ్లే అవకాశం ఉన్నట్టు తెలుస్తున్నది. కాంగ్రెసు పార్టీకి తాను ఒక సుశిక్షితుడినైన సైనికుణ్ణని ఆయన తాను రాజీనామా చేసిన సందర్భంలో ప్రకటించారు. ఎన్ని తలనొప్పులు వచ్చినా 14 నెలల 22 రోజులపాటు ముఖ్యమంత్రి స్థానంలో అధిష్ఠానం చెప్పినట్టు పనిచేసిన రోశయ్యకు సముచిత స్థానం కల్పించాలని కాంగ్రెసు పార్టీ అధిష్ఠానం భావిస్తున్నది. ఇందుకు సంబంధించిన నిర్ణయం రెండు రోజులలో వెలువడవచ్చునని తెలుస్తున్నది.

రాజీనామా ప్రకటిస్తున్న సమయంలోనే రోశయ్య పార్టీ అధిష్ఠానం ఏ పని అప్పగించినా చేయడానికి సిద్ధంగా ఉన్నట్టు కూడా ప్రకటించారు. ఈ నేపథ్యంలో రోశయ్యను కర్నాటక గవర్నర్‌గా పంపిస్తే గౌరవంగా ఉంటుందని పార్టీ అధిష్ఠానం భావిస్తున్నది. ఈ మధ్య కాలంలో కర్నాటక గవర్నర్ కొంత వివాదాస్పద నిర్ణయాలు తీసుకున్నందువల్ల రోశయ్యను ఆ స్థానంలో కూర్చోబెట్టడం ద్వారా కొంత ఉపశమనం లభిస్తుందని పార్టీ భావిస్తున్నది.