వైయస్ జగన్ వెంట ఉన్న ఎమ్మెల్యేలు, ఎమ్మెల్సీలు వీరే

హైదరాబాద్: ముఖ్యమంత్రిగా కిరణ్ కుమార్ రెడ్డి ప్రమాణ స్వీకారం చేసిన వెంటనే కాంగ్రెసు రాజకీయ పరిణామాలు తీవ్రంగా మారిపోయాయి. కడప పార్లమెంటు సభ్యుడు వైయస్ జగన్ వర్గం తీవ్ర సంక్షోభంలో పడినట్లు కనిపిస్తోంది. శుక్రవారం ముగ్గురు మాజీ మంత్రులు, 15 మంది శాసనసభ్యులు, ముగ్గురు ఎమ్మెల్సీలు వైయస్ జగన్ తో సమావేశమయ్యారు. ఈ స్థితిని బట్టి వైయస్ జగన్ వర్గం బలాన్ని అంచనా వేయవచ్చునని అంటున్నారు. వీరిలో కూడా ఇద్దరు ముగ్గురు ఇప్పటికే కిరణ్ కుమార్ రెడ్డిని కలిసి తమ మద్దతును ప్రకటించినట్లు కూడా వార్తలు వస్తున్నాయి. తమకు మంత్రి పదవులు ఇవ్వాలని కూడా వారు కోరారు.

జగన్ తో మాజీ మంత్రులు పిల్లి సుభాష్‌చంద్రబోస్‌, బాలినేని శ్రీనివాసరెడ్డి, కొండా సురేఖ శుక్రవారం సమావేశమైన వారిలో ఉన్నారు. ఎమ్మెల్యేలు ఆదినారాయణరెడ్డి(జమ్మలమడుగు), రామచంద్రారెడ్డి (రాయదుర్గం), గురునాథరెడ్డి(అనంతపురం), శ్రీకాంత్‌రెడ్డి(రాయచోటి), ద్వారంపూడి చంద్రశేఖర్‌రెడ్డి(కాకినాడ), అమరనాథరెడ్డి(రాజంపేట), పి.రామకృష్ణారెడ్డి(మాచర్ల), శివప్రసాదరెడ్ది(దర్శి), కె.శ్రీనివాసులు (రైల్వేకోడూరు), జయసుధ(సికింద్రాబాద్‌), ఎర్రం వెంకటేశ్వరరెడ్డి(సత్తెనపల్లి), లబ్బి వెంకటస్వామి(నందికొట్కూరు), కమలమ్మ(బద్వేల్‌), మేకపాటి చంద్రశేఖర్‌రెడ్డి (ఉదయగిరి), ప్రన్నకుమార్‌రెడ్డి(కోవూరు) వైయస్ జగన్ తో సమావేశమైనవారిలో ఉన్నారు. ఎమ్మెల్సీలు కొండా మురళి, పుల్లా పద్మావతి, జూపూడి ప్రభాకరరావు ఆయనతో భేటీ అయ్యారు.