వైయస్ జగన్ పైనే ప్రజారాజ్యం అధినేత చిరంజీవి జాతకం

న్యూఢిల్లీ: చిరంజీవి నేతృత్వంలోని ప్రజారాజ్యం పార్టీని ప్రభుత్వంలో చేర్చుకునే విషయం కాంగ్రెసు పార్లమెంటు సభ్యుడు వైయస్ జగన్ పైనే ఆధారపడి ఉంటుందని తెలుస్తోంది. వైయస్ జగన్ వర్గం తిరుగుబాటు చేస్తే చిరంజీవిని మంత్రివర్గంలో చేర్చుకోవాలనే ఆలోచనలో కాంగ్రెసు అధిష్టానం ఉన్నట్లు తెలుస్తోంది.మంత్రివర్గంలో ప్రస్తుతానికి కాంగ్రెస్‌ శాసనసభ్యులే ఉంటారని ముఖ్యమంత్రి కిరణ్‌కుమార్‌రెడ్డి ఢిల్లీలో ప్రకటించటంతో ప్రభుత్వంలో ప్రజారాజ్యం భాగస్వామి కావటం లేదనేది స్పష్టమైంది. జగన్‌ తీసుకునే నిర్ణయంపైనే ప్రజారాజ్యం ప్రభుత్వంలో చేరే విషయం ప్రధానంగా ఆధారపడుతుంది. కొంతమంది ఎమ్మెల్యేలతో ఆయన కాంగ్రెస్‌ నుంచి నిష్క్రమించే పరిణామం ఏర్పడితే ప్రజారాజ్యం మద్దతు ప్రభుత్వానికి కీలకమవుతుంది. అలాంటి సందర్భంలో విస్తరణ వరకు ఆగాల్సిన అవసరం లేకుండానే ప్రరాపాను ఆహ్వానించే పరిస్థితి వస్తుంది. 2004 ఎన్నికల అనంతరం అప్పట్లో అధికార కాంగ్రెస్‌కి మిత్రపక్షంగా వ్యవహరించిన తెరాసని మంత్రివర్గంలో చేర్చుకోటానికి ప్రత్యేకంగా విస్తరణ చేపట్టారు. అలాంటి స్థితే మరోసారి నెలకొనే అవకాశం లేకపోలేదు.

మంత్రివర్గంలో చేరికపై ప్రజారాజ్యంలో ఇప్పటికీ భిన్నాభిప్రాయాలు వ్యక్తమవుతున్నాయి. ప్రభుత్వంలో చేరితే మేలని కొందరు, చేరకుండా నిర్మాణాత్మక ప్రతిపక్షంగా ఉండాలని మరికొందరు అభిప్రాయపడుతున్నారు. శాసనసభ్యుల్లో అత్యధికులు ప్రభుత్వంలో చేరితేనే పార్టీ బలోపేతమవుతుందని అంటున్నారు. సీనియర్‌ నేతలు మాత్రం ప్రభుత్వంపై విభజన, సమైక్య ఉద్యమాల ప్రభావం, అధికారంలో భాగం పంచుకుంటే దీర్ఘకాలంలో ఎదురయ్యే ఇబ్బందుల్ని ఏకరవు పెడుతున్నారు. మొత్తమ్మీద రానున్న కొద్దివారాల్లో చోటుచేసుకునే రాజకీయ పరిణామాల ఆధారంగానే ప్రరాపా తుదినిర్ణయం తీసుకునే వీలుంది.