వైయస్ జగన్ ఎఫెక్ట్: మారిన కిరణ్ కుమార్ రెడ్డి క్యాబినెట్ కూర్పు

హైదరాబాద్: వైయస్ జగన్ రాజీనామా ప్రభావం ముఖ్యమంత్రి కిరణ్ కుమార్ రెడ్డి మంత్రివర్గ కూర్పుపై పడినట్లే కనిపిస్తోంది. బుధవారం ఉదయం పది గంటలకు కిరణ్ కుమార్ రెడ్డి మంత్రివర్గం ప్రమాణం స్వీకారం చేయనుంది. ప్రజారాజ్యం పార్టీ అధ్యక్షుడు చిరంజీవి మంత్రివర్గంలో చేరకూడదని నిర్ణయించుకోవడంతో కాంగ్రెసు శాసనసభ్యులకు మాత్రమే పరిమితమవుతుందనేది స్పష్టమైంది. 30 నుంచి 35 మంది దాకా మంత్రులను చేర్చుకోవాలని తొలుత కిరణ్ కుమార్ రెడ్డి నిర్ణయించుకున్నారు. అయితే, ఇప్పుడు తన మంత్రి వర్గ కూర్పును మార్చుకున్నట్లు కనిపిస్తోంది.

కిరణ్ కుమార్ రెడ్డి ప్రస్తుతానికి 12 మందికే తన మంత్రివర్గాన్ని పరిమితం చేసే అవకాశాలున్నాయి. పూర్తి స్థాయి మంత్రివర్గాన్ని ఏర్పాటు చేస్తే అసమ్మతి చోటు చేసుకుని అసమ్మతి శాసనసభ్యులు వైయస్ జగన్ వైపు వెళ్లే అవకాశాలుంటాయనే ఆందోళన కాంగ్రెసు అధిష్టానంలో నెలకొన్నట్లు తెలుస్తోంది. దాంతో మంత్రి వదపులపై ఆశలు సజీవంగా ఉంచే ఉద్దేశంతో మంత్రివర్గాన్ని పరిమితి చేయాలని నిర్ణయించినట్లు తెలుస్తోంది. మంత్రి వర్గ విస్తరణ ఉంటుందనే అంశం సజీవంగా ఉంటే శాసనసభ్యులు తమ పదవులు లభిస్తాయనే ఉద్దేశంతో వైయస్ జగన్ వైపు వెళ్లడానికి ఇష్టపడకపోవచ్చునని అంటున్నారు.