ఎమ్మార్ ప్రాపర్టీస్ స్కామ్ ను మళ్లీ ఎత్తి చూపిన విహెచ్

హైదరాబాద్: ఎమ్మార్ ప్రాపర్టీస్ కుంభకోణాన్ని కాంగ్రెసు పార్లమెంటు సభ్యుడు వి. హనుమంతరావు మళ్లీ ముందుకు తెచ్చారు. వైయస్ జగన్ వర్గానికి చెందిన అంబటి రాంబాబు ఎపిఐఐసి చైర్మన్ గా ఉన్నప్పుడు ఈ కుంభకోణం చోటు చేసుకుంది. ఎమ్మార్ ప్రాపర్టీస్ కుంభకోణం వల్ల ప్రభుత్వానికి చెడ్డ పేరు వస్తుందని హనుమంతరావు అన్నారు. ఆయన శనివారం ముఖ్యమంత్రి కిరణ్ కుమార్ రెడ్డిని కలిశారు. అనంతరం ఆయన మీడియా ప్రతినిధులతో మాట్లాడారు. ఎమ్మార్ ప్రాపర్టీస్ కుంభకోణంపై సిబిఐ విచారణకు ఆదేశించాలని ముఖ్యమంత్రిని కోరినట్లు ఆయన తెలిపారు.

రైతుల భూములను రియల్ ఎస్టేట్ వ్యాపారానికి అప్పగించడం సరి కాదని ఆయన అన్నారు. ఉప ముఖ్యమంత్రి పదవిపై ముఖ్యమంత్రి కిరణ్ కుమార్ రెడ్డిదే తుది నిర్ణయమని ఆయన అన్నారు. దానిపై తాము ఎవరినీ ప్రతిపాదించబోమని, ఒత్తిడి తేబోమని ఆయన చెప్పారు. ముఖ్యమంత్రి కిరణ్ కుమార్ రెడ్డికి పార్టీ పార్లమెంటు సభ్యుల సహకారం ఉంటుందని ఆయన చెప్పారు.