రాజకీయాల నుంచి తప్పుకుంటా: రాయపాటి సంచలన ప్రకటన

గుంటూరు: తనను గెలిపించిన ప్రజలకు న్యాయం చేయలేకపోతున్నానని, ఈ కుర్చీలో కూర్చుని ఉపయోగం లేకుండాపోయిందని, అభివృద్ధి చేసేందుకు కొత్త పథకాలు రావడం లేదని, ప్రస్తుత రాజకీయాలూ అనుకూలంగా లేవని, అందుకే మనస్తాపంతో త్వరలో రాజకీయాలకు స్వస్తి పలకాలనుకుంటున్నానని గుంటూరు కాంగ్రెసు పార్లమెంటు సభ్యుడు రాయపాటి సాంబశివరావు అన్నారు. ఇది తన వ్యక్తిగత నిర్ణయమని చెప్పారు. ఎట్టిపరిస్థితుల్లోనూ మనసు మార్చుకునే ప్రసక్తే లేదని ఆయన ఆదివారం మీడియా ప్రతినిధుల సమావేశంలో అన్నారు. తన నిర్ణయాన్ని అభిమానులు మన్నించాలని కోరారు. పదవికి రాజీనామా ఎప్పుడనే విషయం త్వరలోనే వెల్లడిస్తానన్నారు. అదే బాటలో తన సోదరుడు ఎమ్మెల్సీ రాయపాటి శ్రీనివాస్‌ నడుచుకుంటారన్నారు. ఇప్పటివరకూ తానెలాంటి పదవులు ఆశించలేదన్నారు.

'మంత్రులు సరైన వారు రావట్లేదు. జిల్లాకు రప్పించాల్సిన రైల్వే సర్వీసులు, అభివృద్ధి పనులు చేజారిపోతున్నాయి. అన్నీ బెంగాల్‌కే తరలిపోతున్నాయి. గతంలో తలపెట్టిన అభివృద్ధి పనులనూ కొనసాగించలేని దుస్థితి నెలకొంద'ని చెప్పారు. అన్ని పార్టీల నుంచి ఉన్న ఒత్తిడితో యూపీఏ ఛైర్‌పర్సన్‌ సోనియాగాంధీ ఏమీ చేయలేని నిస్సహాయ స్థితిలో ఉన్నారన్నారు. అవినీతి అంశాలను గతంలో అధిష్ఠానం దృష్టికి తీసుకెళ్లినా, పలుమార్లు సీఎంకు చెప్పినా నిరుపయోగంగా మారిందన్నారు. రాష్ట్రంలో ఎమ్మెల్యేలే బాసులుగా చెలామణి అవుతున్నారని, వారి మాటే చెల్లుబాటవుతోందన్నారు. ఏ పార్టీలోనూ చేరనని, ఇక పూర్తిగా రాజకీయ సన్యాసం తీసుకుంటానని తెలిపారు.