వాగులో సుమో కొట్టుకుపోయి 9 మంది మృతి, 4గురు గల్లంతు

గుంటూరు: పుట్టెంట్రుకలు తీయించుకుని సంతోషంగా ఇంటికెళుతున్న ఆ కుటుంబంలో వూహించని విషాదం చోటుచేసుకుంది. కళ్లెదుటే మల్లెడ వాగు 13 మందిని తన ప్రవాహంలో లాక్కెళ్లింది. గుంటూరు జిల్లా వినుకొండ మండలం ఉమ్మడవరం, పిట్టంబండ గ్రామాల మధ్యలో ఉన్న మల్లెడవాగులో మంగళవారం రాత్రి ఈ దుర్ఘటన జరిగింది. సుమోను అధికారులు బయటకు తీశారు. వాహనంలో 9 మంది మృతదేహాలు లభించాయి. మిగతా నలుగురి కోసం గాలిస్తున్నారు. వీరు కూడా మరణించి ఉంటారని భావిస్తున్నారు. వీరంతా ప్రకాశం జిల్లాకు చెందినవారు. ప్రమాదం సంభవించినప్పుడు సుమోలో 16 మంది ఉన్నారు. ప్రమాద సమయంలో ఓ ముగ్గురు మాత్రం చెట్టును పట్టుకుని బయట పడ్డారు. వారిని స్థానికులు రక్షించారు.

ప్రకాశం జిల్లా అద్దంకి గ్రామానికి చెందిన 16 మంది పుట్టెంట్రుకలు తీయించుకునేందుకు గుంటూరు జిల్లా కారంపూడికి మంగళవారం ఉదయం సుమోలో బయలుదేరి వెళ్లారు. కారంపూడిలో కార్యక్రమం అంతా పూర్తయ్యాక తిరిగి బయలుదేరారు. రాత్రి 7 గంటల సమయానికి పిట్టబండ గ్రామాన్ని దాటారు. ఉమ్మడివరం చేరేందుకు మధ్యలో ఉన్న మల్లెడవాగు ప్రవాహం తక్కువగా ఉంటుందనుకుని డ్రైవరు సుమోను నడిపినట్లు భావిస్తున్నారు. ప్రవాహ వేగం ఎక్కువవడంతో వాహనం కొట్టుకుపోయింది.