సభలో అవినీతి, వైఫల్యాలు చర్చకు రావద్దనే: కిషన్ రెడ్డి

హైదరాబాద్: కేంద్ర, రాష్ట్ర ప్రభుత్వాల వైపల్యాలు, అవినీతి తదితర అంశాలు శాసనసభలో చర్చకు రాకూడదనే ఉద్దేశ్యంతో అధికార పార్టీ ప్రయత్నాలు చేస్తుందని భారతీయ జనతా పార్టీ రాష్ట్ర అధ్యక్షుడు, అంబర్ పేట నియోజకవర్గ శాసనసభ్యుడు జి.కిషన్ రెడ్డి శుక్రవారం సభ వాయిదా పడిన అనంతరం అసెంబ్లీ ప్రాంగణంలో ధ్వజమెత్తారు. దేశంలోనే 2జి స్పెక్ట్రం కుంభకోణం అతిపెద్దదన్నారు. అలాంటి కుంభకోణంపై జెపిసి వేయడానికి కేంద్ర ప్రభుత్వం అంగీకరించడం లేదన్నారు. కాంగ్రెసు ప్రభుత్వం రాష్ట్రంలో, కేంద్రంలో భారీ కుంభకోణాల్లో కూరుకు పోయిందని ఆరోపించారు.

ఏడు సంవత్సరాలుగా అధికారంలో ఉన్న కాంగ్రెసు పార్టీ ప్రజ సమస్యలు పట్టించుకున్నది లేదన్నారు. రాష్ట్రంలో పథకాలు ఎక్కడ వేసిన గొంగలి అక్కడే అన్నట్లు ఉన్నాయన్నారు. 2 రూపాయలకు కిలో బియ్య, వర్గీకరణ, జలయజ్ఞం కార్యక్రమాలు మందగించాయన్నారు. వర్గీకరణపై ఏడేళ్లుగా ప్రభుత్వం ఏ నిర్ణయం తీసుకోలేదన్నారు. వరదలు, తుఫాను తదితర క్లిష్ట పరిస్థితుల్లో రాష్ట్ర ప్రభుత్వం అడిగిన మొత్తంలో 4శాతం సహాయం కూడా చేయలేదన్నారు. 42వేల కోట్ల రూపాయలను అడిగితే వెయ్యి కోట్లు కూడా ఇవ్వలేదన్నారు. రైతు సమస్యలపై చర్చించుదామని అధికార పక్షానికి ముందే చెప్పామని అయినప్పటికీ ఆ దిశలో అధికార పక్షం ముందుకు పోవటం లేదన్నారు.