పిసిసి అధ్యక్షుడిగా షబ్బీర్ అలీ, ప్లీనరీ తర్వాత అధికారిక ప్రకటన?

న్యూడిల్లీ: ప్రదేశ్ కాంగ్రెసు కమిటీ అధ్యక్షుడిగా మాజీ మంత్రి షబ్బీర్ అలీని నియమించే అవకాశాలు ఉన్నట్టు తెలుస్తోంది. ఇప్పటికే షబ్బీర్ నియామకం నిర్ణయం అయిపోయినప్పటికీ కాంగ్రెసు ప్లీనరీ తర్వాత ఆయనపై అధికారికంగా ప్రకటించేందుకు అధిష్టానం యోచిస్తున్నట్టు తెలుస్తోంది. పిసిసి అధ్యక్షుడిగా డి శ్రీనివాస్ పదవీ కాలం ఎప్పుడో ముగిసింది. అయితే తాత్కాలికంగా ఆయనే పిసిసి అధ్యక్షుడిగా కొనసాగుతున్నారు. తెలంగాణ ప్రాంత ఉద్యమం, సామాజీక సమీకరణాల నేపథ్యం, మాజీ పార్లమెంటు సభ్యుడు జగన్మోహన్ రెడ్డి తదితర అంశాల కారణంగా పిసిసిపై అధిష్టానం మల్లగుల్లాలు పడుతుంది.

కాగా కేంద్ర నాయకుడు గులాంనబీ ఆజాద్ తో ఉన్న మంచి సంబంధాల కారణంగానే షబ్బీర్ అలీకి ఈ అవకాశం వచ్చినట్లు తెలుస్తోంది. అంతేకాకుండా అల్పసంఖ్యాకవర్గ కోటాలో కూడా షబ్బీర్ ను పిసిసి అధ్యక్షుడిగా తీసుకుంటున్నారనే వాదనలు కూడా వినిపిస్తున్నాయి. దివంగత ముఖ్యమంత్రి వైఎస్ రాజశేఖరరెడ్డితో షబ్బీర్ అలీకి మంచి సంబంధాలు ఉండేవి. ఓదార్పు యాత్ర వరకు కూడా జగన్ తో షబ్బీర్ అలీకి మంచి సంబంధాలు ఉండేవి.

ఆయితే ఆయన పార్టీనుండి బయటకు వెళ్లడంతో అల్పసంఖ్యాకవర్గాలతో పాటు జగన్ వర్గానికి చెక్ పెట్టడానికి షబ్బీర్ అలీనే మంచి ఆయుధంగా అధిష్టానం భావిస్తున్నట్టు సమాచారం. శ్రీకృష్ణ కమిటీ నివేదిక తెలంగాణ, సీమాంధ్రలలో ఏదో ఒక ప్రాంతంలో ఉద్యమం ఉవ్వెత్తున వెలిసే నేపథ్యంలో షబ్బీర్ అలీ పిసిసి అధ్యక్షుడిగా ముస్లింల ఆగ్రహానికి గురయ్యే విషయాన్ని యోచిస్తున్నట్లు సమాచారం.