విద్యార్థులపై కేసుల ఎత్తివేత మీద నిపుణుల సలహాలు: కిరణ్ కుమార్

హైదరాబాద్: విద్యార్థులపై కేసుల ఎత్తివేతకు కొన్ని పద్ధతులు ఉన్నాయని ముఖ్యమంత్రి కిరణ్ కుమార్ రెడ్డి శాసనసభ మూడోసారి వాయిదా అనంతరం తిరిగి ప్రారంభమయిన సమయంలో చెప్పారు. విద్యార్థులపై కేసుల ఎత్తివేత విషయంలో న్యాయ సలహాల సూచనలు తీసుకోవాల్సి ఉంటుందన్నారు. ముస్లిం విద్యార్థులపై పెట్టిన కేసులను సోమవారం చర్చించుదామని ముఖ్యమంత్రి చెప్పారు. రాష్ట్రంలో పంట నష్టపోయి రైతులు తీవ్ర నిస్పృహలో ఉన్నారని రైతుల సమస్యలపై చర్చించుదామని కిరణ్ విపక్షాలను కోరారు.

రాజ్యాంగ విరుద్ధంగా విధ్వంసానికి పాల్పడ్డ వారిపై కేసులు ఎత్తివేసే అధికారం ఎవరికీ లేదని లోక్ సత్తా శాసనసభ్యుడు జయప్రకాష్ నారాయణ అసెంబ్లీ ప్రాంగణంలో శుక్రవారం అన్నారు. అసంబ్లీ రెండోసారి వాయిదా పడిన అనంతరం అయన మీడియా ప్రతినిధులతో మాట్లాడారు. చిదంబరం కేసు ఎత్తివేస్తానని చెప్పటం తప్పేనని చెప్పారు. ఎవరిపైనైనా కేసులు చట్ట ప్రకారమే ఎత్తివేయాల్సి ఉంటుందన్నారు. ఆ కేసులు ఎత్తివేసే అధికారం ఎవరికీ ఉండదన్నారు. బలవంతపు వసూళ్లపై కొందరు భయంతో ఫిర్యాదులు చేయటం లేదని జెపి ఆరోపించారు. గత కొద్దిరోజులుగా పార్లమెంటు సమావేశాలు స్తంభించినట్లే అసెంబ్లీ సమావేశాలను స్తంభింప చేయాలని కొందరు ప్రయత్నాలు చేస్తున్నారని ఆరోపించారు.