రైతు సమస్యలపై చంద్రబాబు నిరవధిక నిరాహార దీక్ష ప్రారంభం

హైదరాబాద్: రైతు సమస్యలపై తెలుగుదేశం పార్టీ అధ్యక్షుడు నారా చంద్రబాబు నాయుడు శుక్రవారం ఉదయం నిరవధిక నిరాహార దీక్షను ప్రారంభించారు. హైదరాబాదులోని న్యూఎమ్మెల్యే క్వార్టర్స్ లో ఆయన దీక్షకు కూర్చున్నారు. రైతు సమస్యల పరిష్కారానికి ముఖ్యమంత్రి కిరణ్ కుమార్ రెడ్డి చేసిన ప్రకటనతో సంతృప్తి చెందని ఆయన నిరవధిక నిరాహార దీక్షకు దిగారు. ఆయనతో పాటు తెలుగుదేశం నాయకులు ఉమా మాధవరెడ్డి, సత్యవతి రాథోడ్, వినుకొండ ఆంజనేయులు, పరసారత్నం, హరికృష్ణ, దేవేందర్ గౌడ్, నాగం జనార్దన్ రెడ్డి, ఎల్ రమణ, కె. ఎర్రంనాయుడు, కె. దయాకర్ రెడ్డి, సీతక్క నిరాహార దీక్షకు కూర్చున్నారు.

అంతకు ముందు చంద్రబాబు ఇంటి నుంచి బయలుదేరి శాసనసభలోని మహాత్మా గాంధీ విగ్రహం వద్ద నివాళులు అర్పించారు. ఆ తర్వాత ట్యాంక్ బండ్ వద్ద గల అంబేడ్కర్ విగ్రహానికి పూలమాల వేసి నివాళులు ఆర్పించారు. అనంతరం ఎన్టీఆర్ ఘాట్ కు చేరుకుని ఎన్టీఆర్ కు ఘనంగా నివాళులు అర్పించారు. అక్కడి నుంచి న్యూఎమ్మెల్యే క్వార్టర్స్ వరకు పాదయాత్ర చేశారు. పాదయాత్ర అనంతరం ఆయన దీక్షకు కూర్చున్నారు.