చంద్రబాబు నిరవధిక నిరాహార దీక్షపై చిరంజీవి మెగా ఫైర్

గుంటూరు: గుంటూరు జిల్లా పర్యటనలో ఉన్న ప్రజారాజ్యం పార్టీ వ్యవస్థాపక అధ్యక్షుడు చిరంజీవి తెలుగుదేశం పార్టీ అధ్యక్షుడు, మాజీ ముఖ్యమంత్రి చంద్రబాబునాయుడిపై శుక్రవారం తీవ్రస్థాయిలో విరుచుకు పడ్డారు. చంద్రబాబునాయుడు అధికారం కోసమే నిరవదిక దీక్ష చేపట్టరాని ధ్వజమెత్తారు. అధికారం కోసం రైతులను అడ్డుపెట్టుకొని దీక్ష చేపట్టడం సిగ్గుచేటు అన్నారు. రాష్ట్రంలో రాజకీయంగా మెరుగు పడేందుకు ఈ దీక్షను ఆయన ఉపయోగించుకుంటారన్నారు. అఖిలపక్షం ముందు ఎకరాకు 5వేల రూపాయలు ఇవ్వాలన్న చంద్రబాబు తాను ఛాంపియన్ అవడానికి ఇప్పుడు 10వేలు ఇవ్వాలని డిమాండ్ చేస్తూ దీక్ష చేస్తున్నారన్నారు.

పంట నష్టపోయిన రైతులను పరామర్శించేందుకు చిరంజీవి గుంటూరు, కృష్ణా జిల్లాల పర్యటనలో భాగంగా శుక్రవారం గుంటూరు చేరుకున్నారు. అక్కడ పలువురు రైతలను పరామర్శించారు. పంటపొలాలను పరిశీలించారు. కాలువలో పూడిక తీతలు తీసి ఉంటే రైతుకు ఇంత నష్టం జరిగేది కాదన్నారు. అందరికీ అన్నం పెట్టే అన్నదాత ఇప్పుడు తానే అన్నం కోసం ఎదురుచూస్తున్నారన్నారు.