అధికార దాహంతోనే చంద్రబాబు నిరాహార దీక్ష: కన్నా లక్ష్మినారాయణ

హైదరాబాద్: రైతు సమస్యలపై నిరవధిక నిరాహార దీక్ష చేస్తున్న తెలుగుదేశం పార్టీ అధ్యక్షుడు నారా చంద్రబాబు నాయుడిపై మంత్రి కన్నా లక్ష్మినారాయణ ధ్వజమెత్తారు. అధికార దాహంతోనే తెలుగుదేశం పార్టీ అధ్యక్షుడు నారా చంద్రబాబు నాయుడు రైతు సమస్యలపై నిరాహార దీక్ష చేస్తున్నారని ఆయన శుక్రవారం మీడియా ప్రతినిధుల సమావేశంలో విమర్శించారు. చంద్రబాబు రైతుల కోసం నిరాహార దీక్ష చేయడం లేదని, అధికారం కోసం చేస్తున్నారని ఆయన అన్నారు.

దివంగత నేత వైయస్ రాజశేఖర రెడ్డి స్ఫూర్తితో తమ ప్రభుత్వం రైతు శ్రేయస్సు కోసం పని చేస్తోందని ఆయన అన్నారు. నష్టపరిహారం కోసమే రైతులు ఆత్మహత్యలు చేసుకుంటున్నారని అధికారంలో ఉన్నప్పుడు చంద్రబాబు అన్నారని, దీన్ని బట్టి చంద్రబాబు చిత్తశుద్ధి ఏమిటో అర్థం చేసుకోవచ్చునని ఆయన అన్నారు.