శ్రీకృష్ణ కమిటీ ఎక్స్ ట్రాపై ధ్వజమెత్తిన కాంగ్రెస్ సీనియర్ కేశవరావు

న్యూఢిల్లీ: శ్రీకృష్ణ కమిటీ తనకు అప్పగించిన పనిని మాత్రమే చేయాలని అలా కాకుండా వేరే వాటిపై దృష్టి సారించకూడదని కాంగ్రెస్ సీనియర్ నాయకుడు కె కేశవరావు శ్రీకృష్ణ కమిటీపై శుక్రవారం ధ్వజమెత్తారు. నివేదిక ఎలా ఉన్నా అందరూ సంయమనంతో ఉండాలని, దేశభక్తి చాటాలని మాకు చెప్పటం సరికాదన్నారు. శాంతియుతంగా ఉద్యమించాలని సలహాలు ఇవ్వాల్సిన అవసరం కమిటీకి లేదన్నారు. కొందరు తెలంగాణ ద్రోహుల వల్ల గత సంవత్సరం కేంద్రం ప్రకటించిన తెలంగాణ ఆగిపోయిందన్నారు. త్వరలో వారి పేర్లు బయట పెడతానన్నారు.

కేంద్రం అప్పగించిన పని కాకుండా గవర్నర్ నరసింహాంను, ముఖ్యమంత్రి కిరణ్ కుమార్ రెడ్డిని కలవడం ఏమిటని ప్రశ్నించారు. శ్రీకృష్ణ కమిటీ నివేదికలో తెలంగాణ కావాలన్న ప్రజల భావాలు నివేదికలో ప్రతిబింబించాలన్నారు. వాస్తవాలను ప్రజలకు తెలియజేయాల్సిన ఆవశ్యకత, బాధ్యత శ్రీకృష్ణ కమిటీకి ఉందన్నారు. శ్రీకృష్ణ కమిటీకి ఇది పరీక్షా కాలమన్నారు. కమిటీ తన నిజాయితీని నిరూపించుకోవాల్సిన సమయం అన్నారు.