సీమాంధ్రలో ఆధిపత్య పోరు కోసమే చంద్రబాబు నిరవధిక దీక్ష: కెటిఆర్

హైదరాబాద్: తెలుగుదేశం పార్టీ అధ్యక్షుడు, మాజీ ముఖ్యమంత్రి చంద్రబాబునాయుడు రైతుల సమస్యల పరిష్కారం కోసమంటూ దీక్ష చేపట్టడం పిల్లి తీర్థయాత్ర వంటిదని తెలంగాణ రాష్ట్ర సమితి నాయకుడు, సిరిసిల్ల శాసనసభ్యుడు కల్వకుంట తారాకరామారావు శుక్రవారం అన్నారు. చంద్రబాబు అధికారం కోసమే దీక్ష చేపట్టారన్నారు. తొమ్మిదేళ్లు పాలించిన చంద్రబాబు రైతులకోసం ఏమీ చేయలేదన్నారు. తాను ముఖ్యమంత్రిగా ఉన్నప్పుడు ఏమీ చేయకుండా ఇప్పుడు రైతుల కోసమంటూ అనడం రాజకీయ ఉద్దేశ్యంమేనన్నారు.

చంద్రబాబును రైతులు ఎప్పటికీ నమ్మరన్నారు. తొమ్మిదేళ్ల తన పాలనలో రైతులకు ఏమీ చేయని చంద్రబాబు వారికి క్షమాపణ చెప్పిన తర్వాతనే దీక్షకు కూర్చోవాలన్నారు. చంద్రబాబు దీక్ష సీమాంధ్రలో ఆధీపత్య పోరుకోసమే అన్నారు. తెలంగాణలో ఎలాగు తెలుగుదేశం పార్టీ లేదు. కాబట్టి సీమాంధ్రలోనన్న పార్టీని బతికించుకోవడానికి ఆయన దీక్ష చేపడుతున్నారని విమర్శించారు.