జగన్ పార్టీలోకి మాజీ మంత్రి పెన్మత్స, కాంగ్రెస్ పార్టీకి రాజీనామా?

విజయనగరం: విజయనగరం జిల్లాకు చెందిన సీనియర్ కాంగ్రెస్ నాయకుడు, మాజీ మంత్రి పెన్మత్స సాంబశివరావు శుక్రవారం కాంగ్రెస్ పార్టీకి రాజీనామా చేయనున్నట్లు సమాచారం. ఈ రోజు సాయంత్రం ఆయన తన రాజీనామా విషయాన్ని మీడియా ముందుకు తీసుకు వచ్చే అవకాశముంది. కాంగ్రెస్ పార్టీకి రాజీనామా చేసి మాజీ పార్లమెంటు సభ్యుడు వైఎస్ జగన్మోహన్ రెడ్డి పార్టీలో చేరనున్నట్లు వార్తలు వస్తున్నాయి. పెన్మత్స సంవత్సరంన్నరగా రాజకీయాలకు దూరంగా ఉంటున్నారు. గత సాధారణ ఎన్నికలలో తన నియోజకవర్గం టిక్కెట్ ను తనకు కేటాయించకపోవటంతో ఆయన రాజకీయాలకు దూరంగా ఉంటూ వస్తున్నారు.

సాంబశివరావు జిల్లాలోని సతివాడ నియోజవర్గంనుండి 8 సార్లు శాసనసభ్యునిగా అసెంబ్లీలోకి అడుగు పెట్టారు. అయితే గత ఎన్నికలకు ముందు సతివాడ నియోజకవర్గం నెల్లిమర్లగా మారింది. అక్కడినుండి దివంగత ముఖ్యమంత్రి వైఎస్ రాజశేఖరరెడ్డి పెన్మత్సను కాదని ఆయన కుమారుడికి టిక్కెట్ ఇచ్చాడు. పెన్మత్స అప్పుడే దానిని తీవ్రంగా వ్యతిరేకించారు. అప్పటినుండి రాజకీయాలకు దూరంగా ఉన్నారు. కాగా పెన్మత్సతో పాటు మరో ఇద్దరు మాజీ శాసనసభ్యులు కూడా పార్టీకి రాజీనామా చేయనున్నట్లు తెలుస్తోంది.