ఒళ్లు నొప్పులు విపరీతం, యోగా చేయలేకపోయా: చంద్రబాబు

హైదరాబాద్: తనకు ఒళ్లు నొప్పులు విపరీతంగా ఉన్నాయని, రోజూ చేసే యోగా ఈ రోజు చేయలేకపోయానని తెలుగుదేశం పార్టీ అధ్యక్షుడు నారా చంద్రబాబు నాయుడు చెప్పారు. రైతు సమస్యలపై చేపట్టిన ఆయన నిరవధిక నిరాహార దీక్ష శనివారం రెండో రోజుకు చేరుకుంది. వైద్యులు ఆయనకు వైద్య పరీక్షలు నిర్వహించారు. ఆయన ఆరోగ్యం క్షీణిస్తోందని వైద్యులు చెప్పారు. మాట్లాడితే శక్తి తగ్గుతుందనే ఉద్దేశంతో ముఖ్యులతో మాత్రమే మాట్లాడుతున్నట్లు ఆయన తెలిపారు.

మీడియా ప్రతినిధులతో కూడా ఆయన క్లుప్తంగా మాట్లాడారు. తన కోసం కాకపోయినా రైతుల కోసమైనా రైతులను ఆదుకోవడానికి ప్రభుత్వం ముందుకు రావాలని ఆయన అన్నారు. ప్రభుత్వం ప్యాకేజీ సంతృప్తికరంగా ఉంటే రైతు ఆత్మహత్యలు ఎందుకు జరుగుతున్నాయని ఆయన ప్రశ్నించారు. ఇవే విషయాలతో తాను ప్రధాని మన్మోహన్ సింగ్ కు లేఖ రాయనున్నట్లు ఆయన తెలిపారు. ప్రభుత్వం ప్రకటించిన ప్యాకేజీ అసంపూర్ణంగా ఉందని ఆయన చెప్పారు.