తెలంగాణ రాష్ట్రం ఆలస్యానికి కెసిఆర్ కారణం: పాల్వాయి గోవర్ధన్ రెడ్డి

హైదరాబాద్: తెలంగాణ ఆలస్యం కావడానికి తెలంగాణ రాష్ట్ర సమితి అధ్యక్షుడు కె చంద్రశేఖరరావు కారణం అని కాంగ్రెస్ సీనియర్ నాయకుడు పాల్వాయి గోవర్ధన్ రెడ్డి సోమవారం అన్నారు. కెసిఆర్ కాంగ్రెస్ వాళ్లని రాజీనామా చేసి రమ్మని చెబితే వినడానికి మేం తెరాస కార్యకర్తలం కాదన్నారు. తెరాస వాళ్లు ఆయన చెప్పగానే రాజీనామా చేసి వెళతారు. మాకు ఆ అవసరం లేదన్నారు. కాంగ్రెస్ వాళ్లని దద్దమ్మలు, చవటలు అంటున్న కెసిఆర్ వ్యాఖ్యలను ఆయన తప్పుబట్టారు. తెలంగాణ ప్రజలే చవటలెవరో తెలుస్తారన్నారు.

తెలుగుదేశం పార్టీ అధ్యక్షుడు చంద్రబాబునాయుడు తెలంగాణ ఉద్యమాన్ని పక్కదోవ పట్టించడానికే దీక్ష చేస్తున్నారన్నారు. రైతులను కాంగ్రెస్ ప్రభుత్వం బాగా ఆదుకుంటుందన్నారు. శ్రీకృష్ణ కమిటీ తమ నివేదికను కేంద్రానికి సమర్పించగానే ఈ బడ్జెట్ సమావేశాల్లో బిల్లు పెట్టడం వీలు కాదన్నారు. కమిటీ రిపోర్టు ఇచ్చాక దానిని పరిశీలించేందుకు కేంద్రానికి సుమారు మూడునెలల సమయం పడుతుందన్నారు. తెలంగాణ విషయంలో కేంద్రం వెనుకడుగు వేస్తే యుద్ధమే ఉంటుందన్నారు.