దీక్షలతో కాంగ్రెసు ఎంపీల్లో కదలిక, ప్రధానితో సమావేశం

హైదరాబాద్‌: రైతు సమస్యలపై తెలుగుదేశం పార్టీ అధ్యక్షుడు నారా చంద్రబాబునాయుడి నిరవధిక నిరాహార దీక్ష, వైయస్ జగన్ 48 గంటల నిరాహార దీక్ష నేపథ్యంలో కాంగ్రెసు పార్లమెంటు సభ్యుల్లో కదలిక వచ్చింది. కేంద్ర మంత్రి ఎస్ జైపాల్ రెడ్డి నేతృత్వంలో కాంగ్రెసు పార్లమెంటు సభ్యులు మంగళవారం సాయంత్రం ప్రధాని డాక్టర్ మన్మోహన్ సింగ్ ను కలిశారు. ఓ మేరకు వారు ప్రధాని నుంచి హామీలు పొందారు. రాష్ట్రంలోని రైతులను ఆదుకుంటామని ప్రధాని హామీ ఇచ్చినట్లు జైపాల్ రెడ్డి భేటీ అనంతరం మీడియా ప్రతినిధులతో చెప్పారు.

ప్రకృతి వైపరీత్యాల జాతీయ నిధి నుంచి ప్రస్తుతానికి అడ్వాన్స్ గా 400 కోట్ల రూపాయలు ఇస్తామని ప్రధాని హామీ ఇచ్చినట్లు ఆయన తెలిపారు. రాష్ట్రంలో జరిగన పంట నష్టాలను, రైతు అపారంగా నష్టపోయిన విషయాన్ని ప్రధానికి వివరించామని, సాయం చేయడానికి ప్రధాని ముందుకు వచ్చారని ఆయన చెప్పారు. రైతులు ఆత్మస్థయిర్యం కోల్పోవద్దని ఆయన కోరారు. తడిసిన ధాన్యాన్ని ఎఫ్ సిఐ కొనుగోలు చేస్తుందని, నాణ్యత తగ్గిన పత్తిని సిసిఐ కొనుగోలు చేస్తుందని ఆయన చెప్పారు.