సోనియా భారతీయ అమ్మగా మారాలని కృష్ణా రైతులు రక్తం పార్సిల్

విజయవాడ: ఏఐసిసి అధ్యక్షురాలు సోనియాగాంధీకి కృష్ణా జిల్లా చల్లపల్లి గ్రామానికి చెందిన ముగ్గురు రైతులు తమ రక్తాన్ని పార్సిల్ చేసి శుక్రవారం వినూత్న నిరసన తెలిపారు. రైతులు శ్రీనివాస్, రామకృష్ణ, మరో రైతు కలిసి తమ రక్తాన్ని ఢిల్లీలోని సోనియా ఇళ్లు 10-జన్ పథ్ కు పంపించారు. ఇటలీ నుండి వచ్చిన సోనియాకు ఆ దేశం భావాలు ఉన్నాయని భారతీయుల రక్తం ఎక్కించుకోవటం ద్వారానైనా భారతీయ సంస్కృతి, భావం ఆమెలో కలుగుతాయని వారు తమ రక్తాన్ని పంపించారు. రక్తం వెంట వారు ఓ లేఖను కూడా పంపారు.

రైతులకు జరిగిన నష్టాన్ని పూడ్చాలని వారు అందులో కోరారు. భారతీయతపై ఆమెకు అవగాహన లేదని, ఈ రక్తం ఎక్కించుకోవడం ద్వారానైనా భారతీయులపై, భారతీయ రైతులపై ఆమెకు సానుభూతి వస్తుందనే ఉద్దేశ్యంతోనే వారు రక్తాన్ని పంపించినట్లు చెబుతున్నారు. ఆ రక్తం ఎక్కించుకోవడం ద్వారా రైతులకు ఉంటే ఓర్పు, రైతులు పడే బాధలు కూడా తెలుసుకునే అవకాశం ఆమెకు ఉంటుందనే అలా పంపినట్లు చెప్పారు. కాగా రక్తం పంపిన రైతులు తెలుగుదేశం పార్టీ సానుభూతిపరులుగా తెలుస్తోంది.