వైయస్ వివేకానంద రెడ్డి, వైయస్ జగన్ మధ్య మరో భేటీ

కడప‌: బాబాయ్ వైయస్ వివేకానంద రెడ్డి, అబ్బాయ్ వైయస్ జగన్ మధ్య శనివారం ఉదయం మరోసారి భేటీ జరిగింది. శుక్రవారం రాత్రి సివి సుబ్బారెడ్డి నివాసంలో జరిగిన భేటీ విఫలమైన విషయం తెలిసిందే. ఆ నేపథ్యంలో వైయస్సార్ కుటుంబ బంధువుల ఒత్తిడితో మరోసారి వారిద్దరు శనివారం ఉదయం సమావేశమయ్యారు. ఈ సమావేశానికి వైయస్ జగన్ మామ గంగిరెడ్డి చొరవ తీసుకున్నారు. ఈ సమావేశం కాస్తా సుహృద్భావ వాతావరణంలో జరిగినట్లు తెలుస్తోంది.

పులివెందులలో జరిగిన భేటీలో వైయస్ వివేకానంద రెడ్డి మౌనంగా ఉన్నట్లు తెలుస్తోంది. ఈ మౌనాన్ని అంగీకారంగా తీసుకుంటున్నారనే అభిప్రాయం వ్యక్తమవుతోంది. కార్యకర్తల అభీష్టం నెరవేరుతుందని గంగిరెడ్డి అన్నట్లు సమాచారం. వివేకానంద రెడ్డి మెతకబడ్డట్లు చెబుతున్నారు. ఈ స్థితిలో వైయస్ జగన్, వివేకానంద రెడ్డి మధ్య మరోసారి భేటీ జరిగే అవకాశం ఉంది. ఇద్దరు విడిపోతే వైయస్సార్ వ్యతిరేకులు లాభపడుతారని కుటుంబ సభ్యులు, బంధువులు అభిప్రాయపడినట్లు తెలుస్తోంది.