తెలంగాణ ఆందోళన భయం: ఐటి కంపెనీలకు భారీ భద్రత

హైదరాబాద్: ఈ ఏడాది డిసెంబర్ తర్వాత తెలంగాణ ఉద్యమం ఊపందకుంటుందనే అంచనాల నేపథ్యంలో ముఖ్యమంత్రి కిరణ్ కుమార్ రెడ్డి ప్రభుత్వం సైబరాబాద్ లోని ఐటి కంపెనీలకు భారీ భద్రతా ఏర్పాట్లు చేసింది. డిసెంబర్ 31వ తేదీ తర్వాత తెలంగాణ ఉద్యమాన్ని ఉధృతం చేస్తామని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు హెచ్చరిస్తున్నారు. దీంతో ఐటి కంపెనీల భద్రతకు రాష్ట్ర ప్రభుత్వం అత్యధిక ప్రాధాన్యం ఇస్తోంది. ఇన్ ఫర్మేషన్ టెక్నాలజీ (ఐటి) సంస్థలు, వాటి సిబ్బంది భద్రతకు ప్రభుత్వం ఇప్పటికే వేయి మందితో కూడిన కేంద్ర పారా మిలిటరీ బలగాలను సైబరాబాద్ లో దించింది.

నిరుడు డిసెంబర్ లో కొన్ని సంస్థలపై దాడులు జరిగిన నేపథ్యంలో ఈ నెల 31వ తేదీన శ్రీకృష్ణ కమిటీ నివేదిక సమర్పించనుండగా ప్రభుత్వం ముందుగానే చర్యలు చేపట్టింది. ఐటి కంపెనీలకు, వాటి సిబ్బందికి తగిన భద్రతను కల్పించేందుకు పోలీసు ఇన్ స్పెక్టర్ జనరల్ ర్యాంకు అధికారిని నోడల్ అథారిటీగా ప్రభుత్వం నియమించింది. హైదరాబాదులో మైక్రోసాఫ్ట్, ఇన్ఫోసిస్, జిఇ, విప్రో, హెచ్ఎస్బీసి, డెల్, ఐబిఎం, టిసిఎస్ వంటి ప్రముఖ ఐటి సంస్థలు ఉన్నాయి. వాటిలో వేలాది మంది పనిచేస్తున్నారు.