కేసుల ఎత్తివేతపై మరింతగా దిగొచ్చిన సిఎం కిరణ్ కుమార్ రెడ్డి?

హైదరాబాద్: తమ కాంగ్రెసు పార్టీ పార్లమెంటు సభ్యుల నిరవధిక నిరాహార దీక్ష నేపథ్యంలో ముఖ్యమంత్రి కిరణ్ కుమార్ రెడ్డి మరింతగా దిగి వచ్చినట్లు సమాచారం. విద్యార్థులపై మీద పెట్టిన 90 శాతం కేసులను ఎత్తేసేందుకు ఆయన సిద్ధపడినట్లు చెబుతున్నారు. మంత్రులు సబితా ఇంద్రారెడ్డి, కె. జానా రెడ్డి, బస్వరాజు సారయ్య, దుద్దిళ్ల శ్రీధర్ బాబు పార్లమెంటు సభ్యుల చేత దీక్ష విరమింపజేయడానికి చేసిన ప్రయత్నాలేవీ ఫలించలేదు. కేసులన్నీ ఎత్తేసే వరకు దీక్షను విరమించేది లేదని కాంగ్రెసు తెలంగాణ ప్రాంత పార్లమెంటు సభ్యులు స్పష్టం చేశారు.

మరో పది శాతం కేసుల విషయంలో పీట ముడి పడనుంది. అయితే, ఈ కేసులపై కూడా కాంగ్రెసు తెలంగాణ ప్రాంత పార్లమెంటు సభ్యులు పట్టుబడుతారా, చల్లబడుతారా అనేది తేలడం లేదు. మంగళవారం మధ్యాహ్నం లోగా కాంగ్రెసు తెలంగాణ ప్రాంత పార్లమెంటు సభ్యుల చేత దీక్ష విరమింపజేయాలనే ఉద్దేశంతో ప్రభుత్వం ఉన్నట్లు తెలుస్తోంది. కాంగ్రెసు శాసనసభ్యులు, ఎమ్మెల్సీలు కూడా దీక్షకు దిగుతామని హెచ్చరిక చేసిన నేపథ్యంలో ముఖ్యమంత్రి కిరణ్ కుమార్ రెడ్డి పూర్తిగా దిగి రాక తప్పదనే అభిప్రాయంతో ఉన్నారు.