ఫిబ్రవరిలో వైయస్ జగన్ పార్టీని ఇడుపులపాయలో ప్రకటిస్తారు: అంబటి

గుంటూరు: యువనేత వైఎస్ జగన్‌మోహన్‌రెడ్డి పార్టీకి సంబంధించి విధివిధానాలు, సిద్ధాంతాలు, పార్టీ పేరు ఫిబ్రవరిలో ఇడుపులపాయలో ప్రకటిస్తారని ఏపీఐఐసీ మాజీ చైర్మన్ అంబటి రాంబాబు చెప్పారు. ఆయన సోమవారం కొల్లిపరలో మాజీ ఎమ్మెల్యే గుదిబండి వెంకటరెడ్డిని పరామర్శించారు. దివంగత నేత డాక్టర్ వైఎస్ రాజశేఖరరెడ్డి అభిమానులే జగన్ పార్టీకి కొండంత అండ అని ఆయన మీడియా ప్రతినిధుల సమావేశంలో చెప్పారు.

నూతన పార్టీ మైనార్టీ, బడుగు, బలహీన వర్గాల అభ్యున్నతికి దోహదపడే విధంగా ఉంటుందన్నారు. జాతీయ, రాష్ట్ర స్థాయిలో ఏ పార్టీలతోనూ తమ పార్టీకి పొత్తులు ఉండవని స్పష్టంచేశారు. టీడీపీ, పీఆర్పీ, బీజేపీ, సీపీఎం, సీపీఐల నుంచి అనేక మంది నాయకులు, కార్యకర్తలు జగన్ పార్టీలోకి వచ్చేందుకు ఆసక్తి చూపుతున్నారని చెప్పారు. పార్టీ ఏర్పాటుకు సంబంధించి కసరత్తు జరుగుతోందని, విశాఖపట్నం జిల్లాలో ఓదార్పు యాత్ర పూర్తయిన తర్వాత పార్టీ నిర్మాణంపై దృష్టి పెడతామని తెలిపారు.